Klara PERAHYALa semana pasada la Turkia bivyo dias de fuerte emosyon, en mizmo tyempo de anksyedad i de esperansa. Martes demanyana el 28 del mes de Novembre avia en los korasones un sentimyento de reselo i puede ser un resto de rankor, los kualos desparesyeron kaji immedyatamente despues la yegada del Papa.
Şeli GAON
Keridos Lektores,
La semana ultima pasimos una fin de semana muy agradavle.
Shabat demanyana mos fuimos kon mi tio i un amigo eskrivano de mi tio ke vino de Londra por asistir a una seremoniya en la universitad Boğaziçi. El eskrivano se yama Moris Farhi i bive en Londra desde kuarenta anyos.
El izo regalo los tres mil livros ke posedava; a la universitad onde estudyo i para remersyarlo le organizaron una seremoniya.
Komo vino por muy poko tyempo, no teniya dias para kaminar la sivdad, ma shabat se kijo iyir a la isla Heybeli; ke es la isla de mi chikes i manseves.
Kon grande nostaljia; mi tio, su amigo, mi madre i yo arivimos a Heybeli.
Komo de tyempo maraviyozo!... Presto alkilimos un fayton para azer el torno de la isla. Durante una ora i medya, kaminimos kon el fayton en abashando en los lugares karakteristikos d’el torno.
El tyempo estava klaro ,aviya sol, yelado ma seko. En el primer lugar ke abashimos d’el fayton; respirimos el aver limpyo en mirando el panorama.
De una parte la mar ke no estava reboltoneyada, los vapores pasando, de otra parte; la vedrura i los arvoles yenos de pasharos bolando.
A la fin d’el torno, mos fuimos a la kaza ke bivimos antes kuarenta anyos.
La nostaljia de ver la kaza de tavla en su lugar sin dingun trokamyento, mos akodrimos kon mi madre i mi tio de los vizinos ke moravan en el doredor; los turkos, gregos i djudyos ke eramos komo una famiya. Las puertas avyertas; sin espanto de ladron, entravamos komo nada a la kaza ke keriyamos.
Ke sinseridad, ke kerensya, ke amor ke aviya en akel tyempo; antes kuarenta anyos!...
Malorosamente oy peryimos esta unyon, este amigable; todos estan koryendo de detras de sus problemas.
En kada kaza una braza!...
Kontinualamente estamos en un asigo para pueder alkansar a todo modo de kozas ke keremos azer; i no estamos puedyendo arivar a azer lo ke pensamos.
Enfin despues de los rekuerdos mos fuimos a komer al restorante.
Pasimos un dia muy enteresante, onde el turisto estuvo muy kontente i oras de tadre tornimos a la sivdad.
Agora, kero avlar de alhad demanyana ke pasimos kon mi marido i amigos en el Bosfor.
Empesimos a kaminar de Bebek, en el bodre de la mar, mirando los pontes yenos de arabas, los vapores yenos de turistos, en los kafes; konosidos bevyendo te delantre la mar i avlando kon sus amigos, i las kriyaturas cugando en el parko.
Kuando vinimos a Rumeli Hisar; mos dezeo de dezayunar en un kafe ande estava yeno de mansevos.
Entrimos i asperimos kaji vente puntos, porke no aviya lugar.
Un kafe muy rustiko; aviya en un kanton una biblioteka yeno de livros i kozas vyejas; un daktilo antiguo, un pikap kon plakas de antes trenta anyos a lo menos.
En otro kanton una soba forma de tinaja grande i redonda para kayentar a la djente porke estavamos afuera. İ lo mas ermozo un artisto kantando kon el violon; aserkandose de kada meza i tanyendo; tangos, kantikas en fransez, en espanyol i en turko.
Komyendo en esta atmosfera, kon una musika ekstraordinarya mirando enfrente d’el Bosfor; los arvoles paresiyan desinados kon la furcha de un pintor.
Estuvimos fina midi kon muncho plazer en diskutyendo los evenementos de la semana.
Esta atmosfera maraviyosa me izo pensar; ke mozotros las personas kale ke topemos plazer de las mas chikas kozas en la vida. La sanedad, pueder kaminar sin dingun desrepozo, pueder komer lo ke dezeyamos, muestras famiyas en el entorno, madres, padres, ijas, ijos, muestros amigos todos en buena situasyon.
Esto todo es un mirakle; i kale dar lores al Dyo, arogar i remersyar por el estado ke mos topamos.
Kale alegrarmos de las reushitades de muestros serkanos. Saver; ke un abraso i un bezo pueden kurar un korason roto.
Partajar lo ke tenemos para bivir repozados.
Lo ke kero rezumir es; de tomar plazer de todos los evenementos en la vida; por bivir kon esperansa.
