Klara PERAHYALa semana pasada la Turkia bivyo dias de fuerte emosyon, en mizmo tyempo de anksyedad i de esperansa. Martes demanyana el 28 del mes de Novembre avia en los korasones un sentimyento de reselo i puede ser un resto de rankor, los kualos desparesyeron kaji immedyatamente despues la yegada del Papa.
Coya DELEVİ
Oy, 4 Desembre, es el primer diya de mi mueva edad, un diya komo los otros, sin nada de partikolar. Un aniversaryo... Otrun shifro ke se adjusta al de muestra karta de identidad, nada mas. Malorozamente, mos dyeron el nombre de “dinozor.” Ya es verdad ke la eskrivana Mina Urgan intitulo su livro “Rekuerdos de un dinozor.” No ay ke dezir. A mi, frankamente, no me influensa muncho la forma ke mos yaman.
Yo syempre estuve en paz kon mis anyos, kon mi edad. İ, espesyalmente desde 4LJ anyos para aki... Tengo un buto pozitivo, una okupasyon fruktuoza ke me da bastante satisfaksyon. Ser aedados o entrar en anyos... Son solamente nosyones, ke se pueden komentar de diversas maneras. Ay mansevos de 45ᇆ anyos ke se syenten aedados. Ay otros, a la kontra, ke kontinuan a ser aktivos mizmo a los 80- 90. Konosko este modo de personas...
Keridos amigos, en “El Amaneser” ke aparesyo oy kon el “Şalom,” en la 6. oja esto avlando por la Sra. Yvette Anavi, ke konosi a traverso sus eskritas. Partikolarmente en el No. 15 de muestra revista, eya mos ekspliko ke las damas del Sentro “Bet Aam” de Plovdiv (Filibe) le disheron: ”Yvette, keremos ambezar, keremos akodrarmos de la lingua de muestras nonas, de muestros paryentes... Yvette, aze alguna koza...” I, Yvette izo una koza, les aprometyo de azerles un kurso, ampeso a dar lisyones de Ladino antes kaji dos anyos. Visto ke eya propya eksprimo su edad, la puedo eskrivir. Yvette nasyo en el 26 Desembre 1919, ke pensash?... Solamente tyene un protesto: El kurso de Ladino de Estambol, no es el primer en los Balkanes, asigun se eskrivyo... Egzakto...
Un grande shifro de la jenerasyon entre 45- 55, konose el Ladino, esta meldando muestra oja. Me lo estan azyendo saver, seya par telefon, seya direktamente o kon letra. Yo, les rogo de azer i una preva de eskrivir tambyen, un esforso... Dezeamos ver muevos nombres en la oja de J-Espanyol. Me esto permetyendo de azer la mizma rekuesta a los amigos de Ladinokomunita... Ya se ke tenesh ermozos rekuerdos!...
Penso ke munchos entre los lektores konosen el proyekto “CENTROPA”, el sentro de Investigasyones sovre la Istorya Oral de los Djudios de Evropa. Se ampeso en syertos paises, inkluzo la Gresya,i la Turkiya, serkamente,kon el eslogano: “Witness to a Jewish Century.” Se trata del testimonyo a un Siglo Djudio. Aki, en Estambol, se esta realizando por un ekipo enkavesado por el “Sentro de Investigasyones sovre la Kultura Sefarad-Otomana-Turka” i su direktrisa Karen Gerson Şarhon.
La Turkiya tyene una importansa espesyal, syendo el uniko pais Evropeo ke no konosyo la “SHOA”. La Komunidad Sefarad puede prezentar un potansyel de testimonyos, de tradisyones muy rikos. Kon Sefaradis arriva de 70 anyos, se esta azyendo entrevistas entre 2Dž oras... İ, eyas pueden repetarsan komo de 5 para 6 seanses.
Yo esto kontente de partisipar a el proyekto en tal ke informante, mizmo si esto es una atestasyon ofisyel! de mi edad. Yo, a la kontra, lo esto konsiderando komo el privilejyo de ser aedada. Saver ke los rekuerdos, los testimonyos miyos van a tomar sus lugares en las arshivas de la Kultura Sefaradi, me esta emosyonando...
