Eya es konosida komo el monumento de la byenfesensya i d’el lavoro por azer bivir la lingua judeo espanyol.
Klara Perahya lavoro munchos anyos para el profito de Matan Baseter kon sus kolaboradores i fue la baza d’el fondamyento d’el Barınyurt antes quinze anyos. Eya fue el simbolo de la kerensya, de la amistad para los menesterozos, i el apoyo moral de los pansyonaryos.
Alhad demanyana, el Grande Rabino, el presidente de muestra komunitad i todos los keridos de Klara estuvyeron presentes en Barınyurt. El salon de Barınyurt estava organizado komo una boda, las mezas ornadas de kozas delikadas, yeno de rozas en todo los lugares.
Viktor Kohen presidente d’el Barınyurt; la alavo en dizyendo; ke Klara auno la kerensya de la umanidad kon el devuamyento, ke mos ambezo la emportansa d’el menesterozo kon la solidaridad moral i munchas otras kalitades espesyales..
Jojo Nasi el presidente de Neve Shalom; en su diskorso avlo de sus aktivitades umanas i de su personalitad produktiva.
El presidente de muestra komunitad Silvyo Ovadya
La agradesyo por su eforso ke tuvo para unir munchas volontaryas para esta misyon sakra i la pena ke tuvo por su lavoro de sinkuenta anyos.
Todos le presentaron plaketas de plata para agradeser el lavoro ke realizo.
A la fin Seyfi İşman izo una demonstrasyon de un filmo ande mos impresyonimos en vyendo la vida fruktuoza de Klara i Eli Perahya.
Por terminar Eli Meriç kon su akordeon, i Yavuz Hubeş kon el kanun presentaron un konserto de kantikas judeo espanyoles ke emosyono i plazyo a todos los envitados.
Oguramos a Klara i Eli Perahya de aryento muestros korasones; a kontinuar de ser el egzempyo en todo modo de sujetos, i vidas largas....
