Una seremoniya ekstraordinarya en BarınyurtŞeli GAONUna fyesta inolvidavle el 10.12.2006 alhad demanyana en Barınyurt fue organizada para Klara Perahya; persona estimada i muy presyoza de muestra komunitad.
Los artikolos de esta pajina fueron trokado al dalkavo momento.
Alhad el 10 Disembre, pasimoz una demanyana yena de alegria en el salon de Barınyurt.
Dos personas eskrivyeron sovre este evenemento; la una es Klara Perahya, ke kon toda su simplisidad eskrivyo sovre la Matan Baseter, i sovre todos sus koleges ke lavoraron kon eya durante munchos anyos.
Klara mos demando de no meter fotografias a este artikolo. “No se keriya hadras i …”
Despues ke Klara aparejo la pajina yo fui ovligada de trokarla un poko. Por ke, un jurnal deve de refletar los evenementos de una forma verdadera. La simplisidad es un merito, i la verdad una realidad muy valoroza. Es por esta razon ke nuestra amiga, Şeli Gaon, eskrivyo sovre el 15en aniversaryo del Barınyurt i en mezmo tiempo sovre los amigos de Klara Perahya ke tuvyeron el plazer de onorarla por los 60 anyos de sus esforsos kon ardor en esta ovra.
I es por esta mizma razon ke metimos fotografias en el artikolo, malgrado la opozisyon de Klara Perahya.
Pensimos ke estas pajinas son rekordos por las futuras jenerasiones. I es importante de dar buenos egzempios a la manseves.
Kerida Klara, nunka no pensimos a ofenderte. Ma publikar un artikolo ke lo mereses, depende un poko de muestra desizyon.
Puede ser ke estas linyas ke yo eskrivi son yenas de yerros. Ma estate sigura ke estas linyas son de buena voluntad.
Tilda Levi
