La muerte del selebre Historiano Stanford Shaw, el Eskridor del livro ‘The Jews Of The Ottoman
Dora NİYEGOEl selebre historiano Stanford Shaw muryo en el diisesh de este mez. En el diziocho de Desembre, diya de Lunes, Shaw fue enterrado en el Simeteryo Ashkenaz, en Ulus, duspues de la seremonia de los funerayes ke fue akomplida en la Sinagoga de Ortaköy en Estambol. El Grande Rabino Ishak Haleva, El Prezidente de la Komunitad Djudia, Silvyo Ovadya, sus asistentes i el Historyano Ilber Ortaylı asistieron a la seremonia.
Stanford Shaw (1930) era el ijo de una famiya djudiya ke emigraron de Angleterra i de Rusia a los Etados Unidos. Shaw estudio las linguas Araba, Perisana i Turka i la Historiya del Medio Oriente en la Universitad Princeton en el anyo 1952. En los anyos 1956, Stanford Shaw estudyo en la Universitad de Estanbol (Istanbul Üniversitesi) kon munchos Profesores Turkos i fue pionero en arekojer i empleyar los arshives del Emperio Otomano en Estambol. Entre los anyos 1958, Shaw se izo Profesor Adjunto de la Lingua i Historia Turka en la Universitad Harward, i mas duspues se izo Profesor de Turko en la Universitad California, en Los Angeles.
En el anyo 1992, Stanford Shaw se retiro de la Universitad de California, i vino a la Turkiya para ensenyar la Historia Otomana i Turka en la Universitad Bilkent, en Ankara.
Shaw era un myembro onoravle de la Sosietad de la Historia Turka (Türk Tarih Kurumu). Durante estos anyos, Profesor Shaw resivio munchas medalyas de la Universitad Harward, de la Universitad Boğaziçi (en Estambol) i de la Fondasyon de Historia (Tarih Vakfı) en Estambol. Shaw resivio tambien una medalya del Prezidente de la Republika Turka (Liyakat Madalyası) por sus lavoros sovre la Lingua i la Histria Turka.
Stanford Shaw i su mujer Ezel Kural Shaw, endjuntos, eskrivieron numerozos livros i artikolos sovre la Historia del Emperio Otomano i de la Turkiya Moderna.
Su selebro livro ‘The Jews of the Ottoman Empire and the Turkish Republic’ es una sorsa valoroza por los investigatores de la Historia Djudiya de la Turkiya.
Este livro egzamina la Komunitad Djudiya; la formasyon de los karteles djudyos; la kontrubisyon kultural, ekonomika i sosyal de los myembros de la Komunitad Djudiya al Estado Otomano; las relasyones de los djudyos kon el Governo; el rolo del Estado Otomano en la proteksyon de los djudyos kontra el Antisemitizmo Kristiano; el rolo de los djudyos en la Primera Gerra Mondial (Birinci Dünya Savaşı) i en la Gerra de Liberasyon (Kurtuluş Savaşı) en el liderizmo de Atatürk; el rolo de la Turkiya por salvar miles de djudyos fuyendo del Nazizmo; las relasyones buenas de la Turkiya kon el Estado de Israel, del diya de su establesimiento.
Stanford Shaw inyego el djenosid de los armenianos en la Turkiya, lavoro i eskrivio artikolos sovre este sujeto.
