Dora NİYEGOEl selebre historiano Stanford Shaw muryo en el diisesh de este mez. En el diziocho de Desembre, diya de Lunes, Shaw fue enterrado en el Simeteryo Ashkenaz, en Ulus, duspues de la seremonia de los funerayes ke fue akomplida en la Sinagoga de Ortaköy en Estambol. El Grande Rabino Ishak Haleva, El Prezidente de la Komunitad Djudia, Silvyo Ovadya, sus asistentes i el Historyano Ilber Ortaylı asistieron a la seremonia.
Klara PERAHYA
Lo ke asta agora era la aberrasyon (sapıtma) de raros individuos, produkto inyovle de un aborresimyento ansestral, devino una afirmasyon de estado.
Por ke razon, afuera de todo modo de lojika, los kapos aktuales del Iran organizaron esta konferensya sovre la negasyon de la Shoa, bazada unikamente sovre argumentos sin konsistensya ni poder de persuasyon, kuando se trata de un drama resyente, ainda bivo en la memorya universal?
Ke atmosfera psikolojika keren krear? En vista de kualo ? kual es el verdadero motivo de esta tentativa absurda de introduzir el dubyo konsernando la mas grande trajedia de todos los tyempos?
Fin ande puede ir “la libertad de ekspresyon” kuando el eskopo es unikamente de falsar la İstorya?
Es ke un payis ke fue una de las mas grandes sivilizasyones de los tyempos antiguos puede, sin renderse ridikulo a los ojos de la mayoria de la opinyon mundyal, utilizar elementos sin ningun fundamyento kontra un otro puevlo, mizmo si se trata de un puevlo enemigo?
Asta ke grado un reprezentante politiko tyene el poder, no solo de nyegar un fakto konfirmado por el testimonyo de las mas grandes potensyas mundyales de la epoka i partikularmente por la Almanya eya mizma, ma de afirmar tambyen, kon fuersa, su proyekto de destruir un payis ke fue rendido a su puevlo sovre desizyon de la Asamblea Jeneral de las Nasyones?.
La koza seria rizivle si entre los blasfemadores no se topava relijyozos judyos rekonosavles a sus chapeos pretos i pardesus largos, prezentes sovre preteksto de kerer protestar kontra la muerte de ninyos palestinyanos golpeados involuntaryamente durante las repuestas Israelyanas a los multiples asaltos del enemigo.
La sufriensa de un inosente es para todos una ferida profunda, i todos yoramos kuando muere un ninyo mizmo si apartyene al kampo adverso , ma ke puede azer un gerreador kuando el enemigo chaptea a muerte?
En uno de sus diskorsos o eskritas, Golda Mayer avia dicho una palavra en este senso: “Vo (puede ser) perdonar al enemigo de aver matado muestros mansevos ma nunka de averlos forsado a matar eyos mizmos afin de defendersen”
El primer komandamyento sosyal del Dekalogo, uno de los mas fuertes i mas importantes, es: “No Mataras”, la baza mizma de la sivilizasyon. Durante 20 siglos el Judyo no mato, asta desharse matar sin ripostar kuando lo atakavan...ma depues de la Shoha ,en el payis de sus primeros ansestros ande 20 siglos antes su onor de Judyo fue arrebashado, sus livros kemados i sus altares profanados, “el” tomo konsensya de su derecho a la vida i a la dinyita, “el” sintyo el ovligo de defender los suyos, sus padres sus madres komo sus ninyos.
I un punyado de renyegadores, a la favor de una mueva ola de odyo, traisa su puevlo, syego i sodro a la sufriensa de sus propyos ermanos, para afirmar ke segun un teksto arkaiko i anakroniko “Israel no puede ser rekreado sin la venida del Mesiah.”, lo ke sinyifika la negasyon mizma del aktual Estado.
De muevo la mizma lektura byervo por byervo, al detrimento del esprito verdadero de lo ke fue dicho... de muevo este enfoho sovre tekstos vyejos por seguro muy valutozos en las sirkustansyas istorikas ande fueron formulados, ma ke oy en dia deven ser interpretados en el konteksto sosyal aktual…
