Dora NİYEGOEl selebre historiano Stanford Shaw muryo en el diisesh de este mez. En el diziocho de Desembre, diya de Lunes, Shaw fue enterrado en el Simeteryo Ashkenaz, en Ulus, duspues de la seremonia de los funerayes ke fue akomplida en la Sinagoga de Ortaköy en Estambol. El Grande Rabino Ishak Haleva, El Prezidente de la Komunitad Djudia, Silvyo Ovadya, sus asistentes i el Historyano Ilber Ortaylı asistieron a la seremonia.
Traduksyon-Adaptasyon: Coya DELEVİ
LA “BIBLIA” DE BONE
La sivdad de Bone, en Algeria, tyene monumentos konsakrados a los Kultos (inanç) diferentes. Entre eyos, dos eglisyas katolikas, i una meshkita prinsipal, konstruizida sovre las ruvinas de ansyanos templos romanos. İ, naturalmente, Bone tyene tambyen, una Sinagoga famoza. Eya no deve su fama a su arkitektura o a su grandor. Kero dezir no es muy empozante (heybetli). La Sinagoga es reputada por la “BIBLIA” mirakoloza, presyoza, ke es guadrada kon muncho respekto. Asigun las rumores, egziste una leyenda sovre el orijen del Livro Santo.
Komo ya es savido, los Muzulmanes se van azer peregrinaje a las dos sivdades santas de sus relijyon: La Meka i Medina...İ, fue ansi ke, anyos antes, un Moro (Arabo) estuvo ayi. Despues de aver kumplido el akto de su fey, se apronto a partir. En otra sivdad, se okupo de sus echos de komercho. Profitando de la okazyon de aver topado lugar en el nave, empeso su viaje verso Aleksandriya. En este nave viajava i un Djudio, el tambyen de Bone, ke estava tornando de su peregrinaje en Yerushalayim. El posedava una “BIBLIA”, arregalada de la parte del Gran Rabbino, i la teniya guadrada en una kashika de kovre.
Poko mankando para arrivar al porto, esbrocho una furtuna...Tan fuerte ke, la nave kon sus viajadores, fueron englutidos por las aguas...Solo un pasajero salvo, i reusho a yegar a la tyerra. Era el peregino Moro. Kon tyempo torno a su pais natal, konto el dezastre, i la muerte de su kompatrioto Djudio. Paso mezes i kaji todos se olvidaron esta aventura.
Un diya, el kontrolor del porto, remarko, entre las olas (dalgalar) un objekto. Era una kashika de kovre, ke paresiya apresurada (aceleci) de arrivar a la tyerra. El ombre, de vista avizo el “Kaid,”syendo el mas grande ofisyal de la lokalidad. El ordeno a los marineros, de ir en barkas, i tomar el objekto en kestyon.
İ los marineros se alesharon del bodre, ramando (kürek çekerek) verso la kashika. Ma, koza kuryoza, mas un marinero se aserkava para tomarla, eya mas se aleshava de la barka. De esta manera repetaron munchas vezes sin obtener algun sukseso. Kada vez el mizmo rezultado. Los ombres kontinuaron kon obstinasyon, ma, i la kashika se amostro mas obstinada ke eyos, i no se les aserko...
Los marineros tornaron i kontaron el evenimiento. Fue entonses ke, se akodraron todos de lo ke aviya kontado el Moro reskapado de la furtuna. I, naturalmente pensaron al Djudio i a su Biblia. Alora embiyaron unos kuantos Djudios, kargados de aferrar la kashika kaprichoza. İ, maraviya de los Sielos, Apenas estos Djudios metyeron el pye aryento la barka, la kashika ke estava bastante leshos, ampeso a venir verso eyos. Se aserko, aserko, i vino plasarse entre las manos del Rabino. El la avyo kon seremoniya i kito la sakra Biblia de Yerushalayim.
El Moro reskapado ke aviya viajado kon el posesor de la Biblia, kedo enkantado de este milagro (mucize). De su propya moneda, izo fraguar una kazika espesyal para el presyozo objekto. Ansi fue fondada la Sinagoga de Bone. Desde este mirakolo, es una fragua respektada. Dizen, tan onorada es ke, afilu Muzulmanos vyenen para azer sus orasyones...
Contes et Légendes d’Israel-A.Weil
