Sovre mi meza de lavoro unas kuantas revistas, todas muy interesantes. Entre eyas el ultimo egzemplar de “İnformation Juive” ke mos da el teksto del diskorso pronunsyado por el byen konosido Bernard Henri Lévy, a la okazyon del premyo SCOPUS ke le fue desernado por la Universidad Ebraika de Yerushalayim.
BHL es uno de los mas aktivos partisipantes de la Mueva Filozofia Franseza. De una integrita absoluta, el fue uno de los mas fervyentes militantes por la kreasyon de un Estado Palestinyano todo en esforsandose syempre de asumir de una manera absoluta i inkondisyonal, su apartenensya total al judaizmo.
En el dicho diskorso, el selebre pensador Fransez izo una analiz objektiva de la situasyon ande se topo i se topa ainda Israel despues de la gerra del Liban, en estudyando minusyozamente los elementos negativos komo pozitivos ke la kompozan.
Komo se entyende byen, al prinsipyo el avlo de la prekaridad ande se topa Israel, entornado del aborresimyento de syertos de sus vezinos, asta prekonizar su eksterminasyon, el mensyono la atmosfera mundyal imprenyada de un antisemitizmo latente i la indiferensya de numerozas grandes potensyas, laskualas asta poko antes no izyeron nada para luchar kontra este terrivle estado de kozas. El avlo tambyen de la prensa en su mayoria ke kaji syempre topo mas avantajozo i mas espektakular de tomar otomatikamente parte por los palestinianos sin reelmente estudyar el problema en su realidad verdadera, asta mizmo falsar syertos faktos.
Despues de la gerra del Liban, teniamos todos komo un pasto de seniza en la boka, un nyudo en el korason... Israel mos paresyo en supito privado de su prestijyo, flako en su governansa komo en su defensa.
Es djustamente esto, este sentimyento de deskontentes, ke rektifyo Bernard Henri Levy verso la fin de su avla i es “esto” ke dezeo komunikarvos en sitando unos kuantos pasajes de su diskorso.
Entre munchas otras kozas pozitivas, BHL dize lo sigiente: (traduksyon en Jud.Esp. “....malgrado todo lo ke se oye, malgrado todo lo ke meldamos mizmo en la prensa de Tel Aviv, esto maraviyado kada vez ke me topo en Israel por la formidavle vitalidad de la demokrasia Israelyana. Estava aya en los dias eskuros de la gerra, i personalmente vide el esforso echo por Tsahal de evitar al maksimum de tokar a los non-kombatyentes i vide el ministro Amir Peretz los ojos yenos de lagrimas el dia ande se ambezo, kon intervalo de unos kuantos puntos, la muerte de tres de sus soldados i despues la muerte, en una fragua de Beyrouth kontrolada por el Hezbollah, de una famiya de poveretos transformados en eskudo umano ke los gerreadores Israelyanos mankaron de remarkar......
Oygo, komo vozotros todos, este inkreivle debato ke desde la fin de la gerra sakude la sosyeta Israelyana: Ke vale muestra armada? Eske se konduzyo komo kalia? Es ke la estratejia empleada era korekta? Es ke Olmert kometyo errores? Ken semos? Deke estamos aki? Es ke tenemos este derecho? etc...etc... No konosko una otra Nasyon en el mundo ke se demanda de si para si, i de una manera tanto fuerte, kestyones tanto importantes. I es por esta razon ke esto seguro, (malgrado la kriza aktual i malgrado la gerra) kel milagro Israelyano tura ainda” (fin de sitasyon)
Alhad la noche, kuando en la televizyon Franseza vide de muevo Ehoud Olmert i Mahmoud Abbas endjuntos komo dos vyejos amigos, senti reelmente kel milagro Israelyano egziste ainda, i syempre syempre egzistera.
