Avigdor GÜLERYÜZ
Fue un golpe para mi kuando la noche del 15 Desembre, en seduta kon el Embasador Turko en Vilnius (Lituania), resivi una yamada por telefon del Sr. Jak Kamhi dando me la trista novela de la muerte de muestro kerido amigo el Profesor Stanford Shaw. Siendo afuera del pais akeya semana, regreto kon amargura de no pueder topar me en sus funerales i prezentar mis sinseras kondoleansas i mi profunda tristeza a su espoza, kompanyera de vida i de estudios, Prof. Ezel Kural ansi ke a su ija Wendy ke aviya konosido antes katorze anyos en sus kaza en Los Angeles.
Nasido el 5 Mayo 1930 en St Paul en los Estados Unidos de Amerika, en seguida de ser diplomado de las Universidades de Stanford i Princeton,el Prof.Shaw kontinuo sus estudios en Londra i Oxford, i despues en las Universidades de Cairo i Al Azhar. Enteresado desde 1952 a la istorya del Medio-Oriente,el defunto se aprofondiyo sovre la istorya del Egypto Ottomano ansi ke del İmperio Ottomano en jeneral i de la Republika Turka, i naturalamente de los Judios Turkos.
Profesor de lingua i de istorya Turka en las Universidades de Harward i de Los Angeles, El Profesor Stanford Shaw kontinuo a ensenyar en la Universidad de Bilkent en Ankara desde 1999 despues de su retorno a Turkia. Dishe “retorno” porke de siempre la famiya Shaw tenia su kaza en Bebek-İstanbul ande venian kada anyo para pasar sus vakansas.
Autor de munchas ovras sovre el İmperio Ottomano i la Turkia, miembro de la Middle East Studies Association i del Tarih Vakfı (Fundasion de İstoria), el Profesor Shaw resivio titolos de onor de las Universidades de Harward i de Boğaziçi (Bosphorus), del Türk Tarih Kurumu (Asosyasyon İstorikal de Turkia), de la Türkiye Bilimler Akademisi (Akademia Turka de Sensyas), del İslam Tarihi Araştırmalar Merkezi (Instituto Islamico IRCICA) ansi ke la Medalya de Onor del Prezidente de la Republika Turka.
Primer istoriador a empleyar las archivas ottomanas en la redaksyon de sus livros i estudios, el Profesor Shaw siempre apoyo la tezis Turka en el problema ermeni, aunke su kaza en Los Angeles fue bombardada por modo de sus deklarasyones a este sujeto.
El apoyo muestras aktividades en el 500.Yıl Vakfı (Fundasion del Kuinsentenario) i no manko de prokurarmos dokumentos i notas para ayudar siertas de muestras prezentasyones. Tuve el onor i la immensa felisidad de kolaborar kon el Profesor Shaw en el Kapitolo V de su livro The Jews of the Ottoman Empire and the Turkish Republic.
El era el fondador i el primer editor de la International Review of Middle East Studies en los Estados Unidos. Es ansi ke muchas vezes diskutimos la posibilidad de topar fondos para realizar muestro projekto komun ke era de publikar una revista trimestrial o semestrial, yamada International Review of Turkish Jews.
Ke su alma repoze en Gan Eden.
