Klara PERAHYADe kualo avlar en este ultimo artikolo del anyo? De la instabilidad de un universo en perpetual rebuelta? De la soledad del puevlo djudyo, entornado de una parte de odyo i de la otra de indiferensya? De la negasyon sistematika de lo ke konsideramos ser la mas grandes valores del Judaizmo?
Dora NİYEGO
En el establisamiento del Estado de Israel en 1948, biviyan 140끞 djudios en Iran. Duspues de esta data, %85 emigraron a Israel i a los Estados Unidos. En la revolusyon Islamika del 1979, biviyan 80 mil djudios en el payis. Duspues de la revolusyon, en unos kuantos mezes, 60 mil djudios se fuyeron de Iran. En el 16 del Marzo 1979, Habib Elghanian, el Prezidente de la Komunitad Djudia fue arestado i kondemnado a la muerte por ser en kontakto kon Israel i fuyir a los djudios a Israel. De los 1980s, 1990s fin oy, kedo 30 mil djudyos en el payis, los 25 mil bivyendo en Tahran, siendo la mas grande komunitad djudia en el Oriente Medio, afuera de Israel.
El governo de Iran, oy, esta rekonesiendo la komunitad djudia de Iran komo un grupo relijiozo de la minorita. Maurice Motamed es el Prezidente de la komunitad djudia. Los djudios Iranis tienen sus proprio gazeta nombrada komo 'Ofogh-e-Bina' i una biblioteka de la asosiasyon djudia en Tahran. El hospital 'Dr. Sapir Jewish Hospital' es el mas grande hospital de las minoritas relijiozas i la mas grande parte de sus hazinos son Musulmanes.
Komo las otras minoritas relijiozas, los djudios sufren de la diskrininasyon, partikularmente en el komerso, en la edukasyon i en la vida sosial. Los djudios no pueden okupar grandes postos en el governo, en la armada i en los echos del estado. Una atmosfera enemiga kontra la komunitad djudia fue kreada entre los Musulmanes radikales pormodo de la politika del governo Irani kontra Israel. Los djudios son el objektivo de las karikaturas de la Presia Irani. El myembro uniko djudio en el Parlamento Irani, Maurice Motamed, akuzo la presia por las karikaturas kontra el Holokosto i eskrivio una letra al Prezidente de Iran kestyonando 'la inyegasyon del Holokosto' i akuzandolos por azer 'el mas grande insulto a los djudios del mundo entero.
El sistema legal tambien diskrimina las minoritas relijiozas del payis. Se puede dizir ke no ay dinguna restriksion kontra la pratika relijioza de los djudios. Ma el ensensyo de la lingua ebrea i teksos ebreos, aparte los livros relijiozos, no son permetidos en el payis. Las eskolas djudias, komo las otras eskolas, deven de ser aviertas los diyas de Shabbat. Los djudios son permetidos de obtener pasaportos i de viyajar a otros payizes ma deven de pagar taksos adisyoneles por kada viyaje. Solo los djudios ke azen viyajes de komerso no pagan estos taksos. Tambien, komo el governo Irani no permete la emigrasyon de los djudios, todos los myembros de una fimiya no son permetidos de viyajar en mezmo tiempo.
En el anyo 2000, diez djudios fueron kondamnados i emprizonados por relasyones ilegal kon Israel i por formar una organizasyon ilegal. Mezmo ke aktos antisemitikos son ralos en Iran, duspues do la kavza de estos diez djudios, los komersantes djudios en Tahran i en Shiraz sufrieron del vandalizmo i de los boykotes kontra sus ropas.
Aunke el alkohol es ilegal en Iran, los djudios son permetidos de bever vino por las selebrasyones de Shabbat. Los djudios no son permetidos de komunikar kon los grupos djudios afuera de Iran ma en los anyos dalkavo, kon los grandes eforsos de Maurice Motamed, eyos reusheron a obtener el permito de viyajar a Israel por ver sus parientes i los djudyos Iranis en Israel fueron permetidos a entrar a Iran i vijitar sus payis de nasimiento. Pokos kontaktos kulturales son permetidos por los djudios Iranis.
En el Marzo 2006, un grupo de mujeres djudias partisiparon al Folk Dans Festival en Rusia.
La mas grande parte de los djudios oy biven en Tahran, ande aviya tres Sinagogas grandes ma duspues del anyo 1996, no uvo dingun rabi en Iran. Shiraz, Hamedan, Isfahan, Naharivand i Babol son las otras sivdades ande bivyeron los djudios de Iran durante munchos anyos. El simeterio djudio en el Sud de Tahran fue destruido por un proje de batimiento.
En el anyo 1996, aviya tres eskolas djudias en Tahran, ande los elevos djudios formavan la majorita, ma oy los direktores djudios fueron ramplasados kon direktores musulmanes. Kaje kada sivdad de Iran tiene una ovra historika. La tomba de Daniel de Shusha, las tombas de Esther i Mordehay en Hamedan son unas kuantas de estas. Las tombas de los selebres djudios ke bivieron en Iran, la tomba de Haray Uresharga i de Moshe-Ha-Levi (en Kashan), oy endiya, son vijitadas mezmo por los pilgrimes Musulmanes.
