Klara PERAHYADe kualo avlar en este ultimo artikolo del anyo? De la instabilidad de un universo en perpetual rebuelta? De la soledad del puevlo djudyo, entornado de una parte de odyo i de la otra de indiferensya? De la negasyon sistematika de lo ke konsideramos ser la mas grandes valores del Judaizmo?
Oy, un diya de la fin de Desembre 2006…Mankan oras kontadas para entrar en el muevo anyo. Yo, penso, ke lo mas ermozo, sera de arresivir el 2007, en:
Alegrandomos un poko
Coya DELEVİ
En eskarvando mis dokumentos vyejos, ke yamo “mis trezoros,” deskuvri un artikolo, ke yo aviya eskrito para un konkorso organizado por una revista Franseza, antes 15ᆨ anyos. La tema era:”GAITE EST SANTE”(alegriya es sanedad). Lo meldi en sonriendo, i pensi de tresladarlo al Ladino. Es enteresante, komo, mi manera de pensar, mi vizyon sovre la vida, i mi optimismo, no trokaron entervalo de tantos anyos. İ, tambyen, mi pasensya devo dezir, porke es un teksto bastante largo. Penso azer un ancho rezume.
Los doz byervos Fransezes, gaité i joie, en aparensya, tyenen mezma sinyifikasyon. Portanto, ay una nuans entre eyos. Gaité eksprima un estado kontinual, el karakter, de la persona, naturalmente opozada a la melankolia. El sigundo byervo indika un sentimyento, una emosyon kavzados por un evenimiento. Es una demostrasyon de kontentes ke puede ser pasajera o turavle un syerto tyempo.
En Judeo-Espanyol, vamos a emplear entonses, el byervo “ALEGRİYA.” Eya es una dispozisyon oroza de la alma i del spirito, manifestandose kon una umor agradavle, una fizyonomia sonriente. Es tambyen, una kualidad, un sinyo de sanedad moral i fizika, es un dono…ke, en realidad, lo puedemos tener todos. Ansi ke digo syempre, todo dono se puede kultivarse. Komo? Por empesar devemos admeter ke no solo las trandafilas tyenen punchones, ma, ke tambyen, i los punchones tyenen trandafilas. Esto es el optimismo ke kamina braso kon braso, kon la alegriya…
Los doktores afirman :”El moral bueno es la mitad de la terapia. İ,kualo es esto? si no la buena umor, su relasyon entre el “ Sistema Nervozo,” el organismo i el mental? Se deve bushkar remedyos de aleshar el stress, ke kavza danyos. El karakter se agrea, myentres ke la alegriya, el optimismo ermozea la persona. Vemos en vezes, damas de una syerta edad, ke tyenen un sukseso, ke inspiran simpatia. Tyenen una luz interyora ke ilumina sus fizyonomias.
De vez en kuando, mirad de sonreir en pensando o rememorando un rekuerdo dulse, alegre, i otras kozas ermozas. Alora, la djente vos diran ansi:”Oy estas briyando, ke prodokto empleas? Myentres ke otras, kon tyempo, estan tomando un ayre “aedado,”tu komo estas azyendo para kedar manseva?!!” Puede ser ke egzajeri un poko, ma, es ansi.
Para no ser triste, antes de todo devesh ayudarvos de vozos para vozos. En diyas ermozos, un poko de jimnastika…Si gustash, puedesh afilu kantar i baylar!...Si vuestra edad vos permete, un spor kollektivo, no ezitesh. Ay tambyen, el jogging, los kampos, la natura, las flores i los pasharos. Azed prova de bushkar las razones de vuestra umor, diremos, “pesimista.” Mezmo si no se reushe a anularlas, se puede a lo menos, minimizarlas. La Palice disho:-La unika manera de ser alegre, es no ser triste!- El pesimisto, pyedre la gana i la fuersa de gerrear, ma, el optimisto, es pronto a venser las difikultades. Si, par azardo, no reusho, toma una lisyon de eksperyensa.
Syertas personas, se syenten deskorajadas, afilu, sin empesar. Pensan:”a kualo bueno!” Asigun un psikologo, estan azyendo una depresyon intelektuala. Es, munchas vezes, sinyo de tansyon nervoza, ke provyene de una mankansa de esfuenyo. Una “siesta,” afilu, puede ser la byenvenida.
Ay diyas ke mos ”me alevantamos del pye syedro”…Todo se va tuerto. No tenemos gana ni de sonreir. Otro un konsejo profesyonal:”Ensima de una karta jeografika, echad un ojo sovre los paises tenyendo una suerte inferyora a vuestro pais. Klima, gerras, ambyertura ets…Vuestros problemas kedan insinyifyantes...La verdadera alegriya, es “SERYOZA.” No es ni rolo, ni komediya. La persona alegre, save reir kon tarakas, o, simplemente, sonreir. Ma, save, a la okazyon, tambyen, ser grave.
De vez en kuando, devemos alesharmos de muestras okupasyones abitualas i, topar otras ke mos pueden dar plazer. Komo, sintir muzika, meldar un poema, o kedar un momento delantre de un ermozo tablo. Ken toma plazer en peshkando, ken en lavorando en la guerta…Una aktividad diferente de las ke uzamos, mos da felisidad.
La alegriya, la vera, es un dono de los sielos. Es tambyen, una kualidad ke se gana kon un poko de buena veluntad, sin olvidar ke, es tambyen sanedad...Mis sinseros suetos de paz i repozo para el mundo entero, en 2007...
