Gerek Geleneksel Osmanlı Tiyatrosu`nun, gerekse modernleşme döneminin modern Osmanlı Tiyatrosu`nun kuruluşunda diğer gayrimüslim halklarla birlikte Osmanlı Sefarad toplumunun da çok büyük katkıları oldu. UÖMO İlköğretim Sosyal Bölüm Başkanı Fırat Güllü Boğaziçi Gösteri Sanatları Topluluğu`nun web sitesinde yayınlanan yaz&
El ultimo konserto de Jerfi Aji
El 27 Desembre 2006 el pianista Jerfi Aji de retorno por unos kuantos dias a muesta sivdad, dyo un briyante resital en la sala de konserto de la ‘İstanbul Teknik Universitesi’.
Jerfi Aji kompleta aktualmente su formasyon de konsertista en el Konservatoryo de Muzika de Peabody aneksado a la Universidad Johns Hopkins en vista de obtener un sertifikato de egzekusyon.
El program de la prestasyon del 27 Desembre era kompuesto de ovras de John Adams, Franz Schubert, Kamran İnce i Robert Schumann.
A muestro grande regreto (por kestyon de salud) no pudimos asistir a este ermozo konserto i por esta razon demandimos a tres de muestros amigos (en posesyon eyos mizmos de una grande kultura muzikal) de darmos sus impresyones, las kualas vos transmetemos debasho estas linyas:
“En el alto nivel pianistiko ande se topa, Jerfi mos prova kel talente apoyado por el lavoro dyo un fruto ke promete muncho. Su elokuensa muzikal i su teknika reelmente muy desvelopada mostran ke Jerfi ya empeso a rekojer los frutos de su lavoro.
El interpreto las ovras de Schubert, Schumann, Adams i Ince kon muncha maestria, karakter i maturidad, i sovre todo mos dyo la prova de su grande fasilidad a dialogar kon la odiensa. Se ve en este pianista los sinyos karakteristikos de un remarkavle artisto”
- Maurice Pardo.
“Felisito de todo korason el pyanista i akademiko de muzika Jerfi Aji por aver dado a kada una de las ovras ke toko su valor justa, ansi ke por su briyante egzekusyon i teknika superyor ke son la prova de una alma de virtuozo.“
- Dr. Musa Albukrek.
“Jerfi Aji mos dyo una admiravle interpretasyon i una fantastika egzekusyon de Schubert, Schumann, Adams i İnce. El ayego a un alto nivel de maestria i de maturidad. El eskojo ovras difisiles ke pokas personas se atreven a tokar. El kijo venser la difikultad i la vensyo”
–Viktor Albukrek.
Una Ekspozisyon de fotografias Turkas en Vilnius (Lituania)
Una ekspozisyon de 45 fotografiyas sovre La Vida de los Judios Turkos, kompozisyon aparejada por Naim Güleryüz ansi ke su konferensya sovre este mizmo sujeto fue realizada el 19 Desembre 2006 en Vilnius (Lithuania) en los salones del Muzeo Judyo Vilna Gaon.
La asistensya fue grande . En desparte del Embasador de Turkia i de la Misyon Turka, se topavan tambyen: los Embasadores de Los Estados Unidos, Espanya, Vatikan, Austria, Kanada i Polonya, ansi ke reprezentantes del Parlamento i del Ministeryo del Eksteryor de Lituania.
Despues de un sumaryo de la Istorya de syete siglos de los Judios en Turkia, Naim Güleryüz eskapo su prezentasyon en aksantuando ke se deve pensar a las semejansas entre los umanos i no a las diferensyas, sin olvidar ke todos semos los inyetos de un mizmo avuelo, ke seya yamado Avram, Abraham o İbrahim.
La konferensya fue siguida de un pranso de komidas de inspirasyon Sefaradi Turka. (köftes de prasa, kalavasutcho i semola). İ una entrevista kon mi fue enrejistrado de parte de la TV Judia en Vilnius.
Durante esta segunda vijita a Vilnius, Naim Güleryüz no manko de diskutir kon los enteresados, sovre la posibilitad de realizar en los kuatro anyos a vinir projetos en komun entre Vilnius Kapitala de Kultura de Evropa 2009 i İstanbul Kapitala de Kultura de Evropa 2010. De mezmo muestro amigo se intereso a la vida i istorya de los Karaim Turkos bivyendo en Trakai (Lituania).
