A esta okazyon el editoryalisto de la gazeta Haaretz eskrivyo ke: En su kualidad de mayor, Theodor (Teddy) Kollek realizo la tranzisyon i la transformasyon de Yerushalayim de ‘sivdad medyeval kon un gloryozo pasado’ en ‘kapitala de kultura i tambyen de politika’. İ repetando la palavra del Mayor Uri Lupolianski, el adjusto: “Teddy era Yerushalayim i Yerushalayim era Teddy..”
Kon su manera de pensar i su fuerte personalidad Teddy Kollek simbolizo el Yerushalayim unifikado, kapitala del Estado de Israel i tambyen Simbolo de la espiritualidad monoteista en su totalidad, lugar sakro, “depozitaryo de la memorya antigua” i paralelamente “punto intenso de desvelopamyento”, sivdad echa de un vyejo pasado i en mizmo tyempo de un esforso kontinual verso el avenir, kon su ekstraordinarya universidad ande se estudya la Biblia i tambyen a un grado muy alto la fizika i la kemika,ande se ve mansevikas i mansevikos en “short” los pyezes desnudos en sandaletas avyertas, i en mizmo tyempo talmudistos de todo modo de edad vestidos de preto.
En 1967 sovre la demanda de David Ben Gourion Teddy Kollek se avia prezentado i avia ganado la eleksyon para asumir el posto de Mayor. Desde el empesijo el entendyo ke una sivdad divizada no puediya sovrebivir.
La Prensa Israelyana esta unanima para afirmar ke antes de todo Teddy Kollek lavoro al desvelopamyento de Yerushalayim todo en konservando su espesifisidad. El era konvensido ke kada morador, kuala ke fuera su fey o su nasyonalidad devia gozar de los mizmos servisyos i de la mizma kualidad de vida ke los otros.
El supo konsilyar lo antiguo i lo moderno en prezervando la sakralidad de los lugares santos i en fraguando muevos baryos , parkes i eskolas publikas. Ansi el izo de Yerushalayim una sivdad manyifika, moderna i espiritual a la vez.
Teddy Kollek era tambyen muy apresyado por sus esforsos de ekilibrar las demandas i los menesteres de los Djudyos sekulares komo de los ultra ortodokses. El kreo muevos sentros de abitasyon para los relijyozos, leshos (los dias de Shabat) del grande movimyento del trafik, i igualmente terrenos de spor para la juventud.
El respekto simultaneamente los menesteres de los praktikantes komo de la populasyon non-relijyoza i se esforso de ser el padrino de todas las kompozantes sosyales i relijyozas de Yerushalayim.
“El keria ser el patron de la totalidad de Yerushalayim, de todas sus komunidades (avia dicho un dia Reuven Rivlin) i ansi se avia mizmo ganado el respekto de los Palestinyanos”.
Teddy Kollek muryo, ma desha detras de el una profonda doktrina de Justisya, de avenimyento i una immensa posibilidad de paz.
