Şeli GAONKeridos Lektores;De vez en kuando la vida arrondja la persona al pesimismo. Antes anyos, kuando eramos mansevos; mos kreyiyamos ke kada soneriya d`el telefon mos dava esperansa para kualker koza.
Rav Yeuda ADONİ
Kon la peraşa de la semana enpesamos el sigundo livro de la Tora. En el primer livro Bereşit, meldamos en resumido la kreansa de la umanidad i en siguida, el primer Ebreo Avraham, desendyente de Şem, i el resultado de la rasa Semita.
Esta vez, en el livro Şimot, deja no se trata komo un famillia, sino komo un puevlo, i en sus kavesera un Lider, Moşe, komo lo vemoz de fakto, la primera vez ke se adresa a Paro kon los byervos "Şelah et ami" enbiya a mi puevlo" (de este verseto se enspiro el famoso kompositor Mordehay Ben David del kante "Let my people go" ke fue komo objeto a los cudyos de Rusia)
Moşe el primer lider de la Nasyon Cudiya, lo konosemos por primera vez en su nasimyento, ke fue portado al palasyo, i por sigunda vez a edad byen avansada kon los byervos "vayigdal Moşe Vayetse el ehav vayar besivlotam" "i se engrandesyo Moşe, i salyo a sus ermanos i vido sus sufriyensa,". Ez, ke esto ez, la razon de Moşe a ganar la fakultidad de ser un lider famozo tan ke el ez? Es ke solo por ke tuvo kudyo, i piyedad de sus ermanos, gano la Umanidad, un profeta komo Moşe?
İ ser komo objeto de grande valor al famozo sculptor Michael Angelo? Doz Anektodas de la vida de Moşe nos pueden dar luz, a entender la noblez i la valor del karakter de Moşe komo un lider:
1. Despues ke el entervino a salvar la vida de un esklavo Cudyo, kontra un Ejipsyano. El fue denonsado a Paro de parte de otro Cudyo. Por esta razon Moşe fue ovligado kitar el palasyo, fuirse al dizyerto para salvar su vida de la sanya i ravya de Paro. Ke malor / Eske este fakto muy negativo i dolorozo "le troko los sintimyentos de ermandad, i piyadad?
2. Esta vez lo vemos a Moşe en una sivdad ajena ke entervyene a aroncar, i salvar a las ninyas ke vinyeron al pozo a dar agua, a las ovejas antes de los otros pastores, ke no teniyan razon, por ke el dereço era, de las ninyas, ma los pastores se bazaron a la fuersa brutala, Moşe mezmo ke estava en lugar ajeno, no pensa lo ke le puede afitar el avenir, i ke deja en su pasado tenia un egzemplyo amargo, ma el no puede tolerar a la en custisya, i salva al flako de mano de los krueles, mezmo ke eran personas ajenas.
Estos doz pasajes ke mos konta la Tora nos da el egzemplyo el maz grande, i nos se degaja la leson la mas grande i delikado para entender la valor de Moşe.
No es en vano la repuesta del komandante famozo montgamery a la demanda "Ken ez el maz grande lider del mundo" el les respondyo "Moses".
VAYHİ (La peraşa de la semana pasada)
Yosef fue el dirijente del ejipto, i todo se aziya kon su komando. Yosef mando a sus ijos Efrayimi Menaşe ande su padre Yaakov porke deprendyeran de el sensya i ley i Kaminos del Kriyador. Yaakov bivyo repozado en Mitsrayim 17 anyos.
Arivando Yaakov a la edad de 147 anyos i vyendose ke sus diyas se estan aserkando para murir. Yamo a su Kerido ijo Yosef i le rogo de azerle una grande favor de no entenarlo despues de su muerte en la tyera de Mitsrayim, si no de yevarlo a la tyera de Kenaan i enterarlo en la meara ke estan enterados ai sus padres Avraam i Yitshak. Yosef curo de azer el komando de su padre i se torno Yosef a su luguar.
Despues de esto estando hazino Yaakov i terminandosen sus diyas, fue Yosef kon sus ijos a ver a su padre despues de resivirla kon munça onor i amistad. Lo bendişo a el i a sus ijos. Los bendişo dizyendo: Menaşe i Efrayim seyan konsiderados komo dos ijos de Yaakov. Yamo tambien a todos sus ijos i los enkomendo ke se konporten de buena manera kon amistad unos kon otros. İ ke syervan a el Kriyador eyos i toda sus famiya. Los bendişo a kada uno i uno sigun su meresimyento. İ se esportyo Yaakov de este mundo.
La movedad de la muerte de Yaakov se sintyo en todo el ejipto. Su ijo Yosef i todos sus ermanos i toda la famiya yoraron i endeçaron a sus padre.
Todo el ejipto se inço de luto i limunyo i lo yoraron 70 diyas sigun el uzo ke se uzava.
Pasando lo 70 diyas de limunyo, demando Yosef la permisyon de paro de ir i yevar a su padre a enterarlo a la tyera de Kenaan.
Paro le dyo orden, de azer komo le enkomendo su padre, ordeno en mismo tyempo, ke seya akonpanyado de todos las personajes de la sivdad por onor del defonto Yaakov, i de Yosef su ijo. İ ke se le aga onra grande.
Ansi fue ke lo yevaron a la tyera de Kenaan a Hevron kon munça onra. Todos los podestadores de akeyas partes se izyeron un dover de asistir a los fonorayes de Yaakov Avinu. İ todos le izyeron ai endeça grande.
