SOVRE YEHORAM GAON I SU OVRA

El sovredicho filmo puede ser konsiderado komo la istorya de la famiya Gaon. Ma yo vide mas ke esto... Es tambyen la istorya de munchos Sefaradis ekspulsados de la Espanya. Kuando kon Romanseros en Judeo-Espanyol, kuando kon kantikas en ebreo, estamos pasando de un pais al otro. Paises komo la Olanda, Italya, Yugoslavya, Gresya, Turkiya, ets. ande los Djudios empesaron una mueva vida.
A un momento, mos estamos indo leshos, a New-York... En la Estatua de la Libertad, tenemos el tyempo de meldar estos byervos gravados: ”Give me your tired poor, your huddled masses yearning to breathe free...” Son palavras del soneto de la poetesa Amerikana Emma Lazarus. Desendyente de una famiya Sefaradi, Emma eskrivyo esta poezia intitulada “THE NEW COLOSSUS” (El Muevo Koloso) i disho: “Dame todos los persegidos, los menesterozos ke aspiran a un soplo de libertad...”
De muevo, estamos retornando al Mediterraneo, al Maroko... I sintyendo un kante de Shabbat, o otros rituales diferentes de komunidad a komunidad... En Bosnia, mos estamos ambezando ke toda la famiya del padre de Yehoram Gaon fue eksterminada en el OLOKOSTO... En un pasaje a Venezia, estamos detektando un ayre de “Romansero” en la muzika de G. Verdi, en sintyendo la muy famoza kantika:

ADIO KERIDA

Tu madre kuando te paryo
I te kito al mundo,
Korason eya no te dyo,
Para amar segundo.
  
Adiyo, adiyo kerida,
No kero la vida,
Me la amargates tu...

Va bushka otro amor
Aharva otras puertas,
Aspera otro ardor,
Ke para mi sos muerta... (refrano)

Keridos amigos, este filmo ay mas de 10 anyos ke salyo. Yo no me arto de verlo. Kreo ke avra CD o DVD’s muevos. Ya se tambyen ke ay i el livro (en Inglez i Ebreo), kon unas fotos maraviyozas. Si me permetesh aki un konsejo: es un ermozo regalo para los Ladino-avlantes. Es una fyesta de muzika, de Istorya i rekuerdos.