En el anyo 1976, solo 500 djudios biviyan en Libano.
Oy, algunos dizen ke sien djudios biven en Libano, otros dizen ke no ay mas de kuarenta djudios en el payis. Todos biven en Beirut, la sivdad ke un tiempo abrigava diisesh Sinagogas. La Sinagoga ‘Maguen Avraham’ ke se topa enfrente del edifisio del Primer Ministro Fuad Siniora, dainda tyene la Magen David enriva las kolonas. Este imajen reflekta la vitalidad de la komunitad de un tiempo. Ma oy, kon su tejado destruido, el estado de la Sinagoga no esta diferente del estado de la komunitad djudia de oy.
Komo estan bivyendo estos djudios en Libano oy? En ke estado se toparon en la gerra pasada ke Israel realizo kontra Hizbullah?
Maurice, un djudio Libanezo, ke esta bivyendo en Paris deste tres anyos, esta mirikiyozo del estado de los djudios en Libano. ‘Beirut era una sivdad muy ermoza’ esta dizyendo Maurice. ‘Los djudios, los Shiitos, los Sunnitos, los Kristianos todos biviyamos en pas, teniyamos buenas relasyones i pokas problemas. Las diisesh Sinagogas eran yenas de djente los diyas de Shabbat i los diyas de fiesta. En la gerra sivil, la majorita de los djudios se fuyeron de Beirut. En el anyo 1982, kuando Israel atako Beirut, pensi ke, puedeser puediya bivir en Nahariya, en Israel, i puediya kontinuar a lavorar en Beirut. Ma den diya en diya, la situasyon empeso a deteriorar. La milisia de Hizbullah mos estava tenyendo komo enimigos. En este anyo, aviya manko de mil djudios en Libano. En el anyo 1985, antes del retiro de Tsahal de la Zona de Sekuridad, biviya dayinda 700 djudios en el pais. Yo me desidi de kedarme en Libano. Ma no estavamos mas repozados. Uno de mis parientes fue asasinado por Hizbullah. No era mas posivle de realizar una vida djudiya en Libano. Los Kurtos i los Shiitos teniyan el kontrol de muestos lugares en sus manos. La Sinagoga ‘Maguen Avraham’ i el edifisyo de ‘Talmud Torah’ fueron atakados munchas vezes. Los politikos Kristianos estavan dainda mirando a protejarmos i avlaron munchas vezes kon Hariri, el vyejo Primer Ministro, para mirar si era posivle de restorar la Sinagoga. En el anyo 2002, el Primer Ministro, mos aprometyo de reparar la Sinagoga i de restorar las partes ke fueron destruidas por las atakas. Ma su promesa no fue mentenida. ‘Maguen David’ nunka fue restorada. Segun la ley Libaneza, la reparasyon de una proprietad es una obligasyon. Ma komo muestra komunitad no teniya pueder finanserio, fuimos ovligados de transferar la Sinagoga al Estado.
Oy, la relijion djudia no se pratika mas en Libano u puede ser ke se pratika en sekreto. Los diyas antes de Kippur, las famiyas se van a las tombas de sus parientes. Los reprezantantes de la komunidad mas no asisten a las seremonias ofisiales. La komunidad mas no kere resivir los vizitantes etranjeros ke son lo mas jurnalistos i turistos kuriozos. Ma el governo esta kontinuando a rekoneser la komunidad djudiya komo uno de los diisesh grupos relijiozos’.
Maurice keriya ir a Libano, topar los puerpos asasinados por Hizbullah i aparejarles un enterro dinyo. El dezeyava de protejar su djente, mentener una prezensia djudia en Libano para amostrar al mundo ke el komporto kontra los djudios es solo el rezultado de la ignorensia.
Komo todos lo savemoz, la istoria de los djudios en Libano no es solo el rezultado de la opozisyon por Israel. Par kontra, Israel es la repuesta al antisemitizmo i a la represion ke los djudios rankontraron en el mundo entero.
Ay unos kuantos mezes, ke los djudios de Libano fueron el objekto de la kuriozidad de la presia Araba. En el periodiko Arabo, ‘Okaz’ del Marso 2006, ay munchos artikolos i entrevistas kon los djudios ke biven dainda en Libano. En una de estas entrevistas, Zeev G. esta dizyendo ke los djudios no estan mas partisipando a las eleksiones porke no les demanden ‘Por ken estash votando?’. En Beirut, ay un restoran de un djudio ma el posedor esta guadrando su relijion. Liza no esta mas guadrando ni su nombre, ni su relijion. Liza tiene sukuenta anyos i esta dizyendo ke eya es prove i muy vyeja, por esta razon no tiene nada de espantarse.
Traduizado de un artikolo de David Bronner, jurnalisto de Guysen Israël News
