Dora NİYEGOLa emigrasyon de los djudios de Libano fue diferente de los ke emigraron de los otros paizes arabos. Los Arabos Kristianos siempre tuvieron buenas relasyones kon los djudios de Libano. Ma duspues de la Gerra de Kippur, munchos djudios se sintieron ke estan en peligro i por esta razon emigraron a Fransia, Italia, Angleterra i a Amerika. Munchos Libanezos ya estavan enstalados en Israel del anyo 1967. En el anyo 1974, la situasyon ya estava deteriorada i aviya kedado 18
Klara PERAHYA
Myerkoles el 10 del mez koryente, Khaled Meschaal kapo de la rezistensya Islamika del Hamas ke bive en egzilyo en Damas deklaro lo sigyente a la ajensia Reuter: “La egzistensya de Israel es “un fakto”, “una realidad” ma el Hamas no lo rekonosera ofisyelmente ke solo kuando un estado palestinyano sera kreado. El problema no es la egzistensya de una entidad ke se yama ısrael ,el problema es ke el estado Palestinyano no egziste.”
El editoryalisto de la gazeta Franseza“Le Nouvel Observateur”ke mos raporto esta deklarasyon mos dize “El Hamas refuzava asta este dia de achetar la egzistensya de Israel i agora el admetyo ke se trata de una realidad.” (fin de sitasyon)
La deklarasyon del shefe palestinyano es por segura ekivoka (çift anlamlı) yena de ambiguidad (muğlaklık). El no rekonose la lejitimidad del estado de Israel ma tambyen no la nyega: “En tanto ke Palestiniano , yo sostengo la revendikasyon palestinyana i araba de un Estado palestinyano, en las frontyeras de 1967. En realidad avra una entidad o un Estado yamado Israel sovre el resto de las tyerras paletinyanas. Es una realidad, ma no kero por esto rekonoserla o admeterla formalmente.” (Reuters)
Es klaro ke esta deklarasyon fue echa por Khaled Meschaal,shefe del Buro Politiko del Hamas, en el solo interes de su partido i sometida a una serie de kondisyones i revendikasyones akseptavles o non akseptavles ,ma en la epoka de odyo, negasyonizmo, amenazas i negasyon del derecho de Israel a egzistir etc... en la kuala mos topamos, eya parese tener una syerta sinyifikasyon.
Esta deklarasyon tyene un enorme potensyal de posibilidades de dialogo... Por la primera vez Israel sale de su kondisyon de “entidad non egzistyente” para devenir “entidad egzistyente aunke no akseptada”, del estado de“non-ser” a un estado de “ser”.
Por seguro, esto no konstitue ninguna seguridad de reglamyento del konflikto, las revindikasyones akseptavles o non akseptavles estan syempre aya, i tambyen el mizmo sospecho los unos enverso los otros, ma una koza parese aver trokado.
Khaled Meschaal prechizo ke “La karta (ferman) del movimyento radikal Palestinyano ke yama a la destruksyon del Estado Judyo puedra trokar en un futuro leshano kuando las kondisyones eyas mizmas trokaran.” (Reuters)
El septisizmo (komo se entyende byen) es jeneral, el mundo pyedro su fakultad de kreer, la deskonfiensa devino permanente. Sin dubyo los elementos de pleto son nombrozos, los interlokutores duros, obstinados en sus manera de pensar, sin dubyo las dos situasyones (la Palestinyana i la Israelyana) aunke paralleles son a la baza diametralmente kontraryas la una a la otra, tambyen las mentalidades i la persepsyon de la realidad, ma todo puede ser posivle si ay un reel “facha a facha” i sovre todo si ay la voluntad de ayegar a un akordo akseptavle de las dos partes.
En este momento no ay nada de palpavle, salvo una chika posibilidad de pueder avlar, i esto no es poko.
