Klara PERAHYATodo el ke salva una alma es komo si salvava la umanidad entera(el Talmud)
Juevez el 18 /1/2007, en Paris,en la immensa sala de resepsyon del Pantheon uno de los lugares los mas prestijyozos de Fransya ande se topan las sepulturas de las mas grandes personalidades de la Istorya del payis, Jacques Chirac Prezidente de la Republika Franseza i Simone Veil, reskapada de Auschwiz, fundadora i aktual Prezidente de la Asosyasyon para la “Konservasyon de la Memorya de la Shoa” desvelaron una plaka apozada sovre una de las paredes interyores del grandiozo edefisyo, en omenaje a “los Djustos rekonosidos” i tambyen a “los anonimos” ke salvaron djudyos al risko de sus propya vida,
En la asistensya kaji todos los myembros del Governo aktual Fransez,el Primer Ministro Villepin, el Kandidato a la Prezidensya Sarkozy, ansyanos primer-ministros komo Lionel Jospin, Laurent Fabius, numerozos parlamentaryos, el Gran Rabbino de Fransya, el Direktor del muzeo Yad Vashem, nombrozos reprezentantes de diferentes relijyones, el eskritor Elie Visel i munchas otras personalidades de notoryedad mundyal
Sovre la plaka en kestyon se topa el teksto sigyente
Debasho la kuvyerta de odyo i de oskuridad ke se abatyo sovre la Fransya en los anyos de la okupasyon nazi , miles de luzes refuzaron de amatarsen. Nombrados “Justos entre las nasyones” Mujeres i Ombres de diversas orijenes i relijyones salvaron djudyos de las persekusyones antisemitas i de los kampos de eksterminasyon. Afrontando los riskos los mas peligrozos, eyos inkarnaron el onor de la Fransya, sus valores de Justisya, de toleransya i de umanidad.
Los anyos eskuros de la shoa fueron los mas dolorozos i sovre todo los mas desgradantes para la Umanidad en su totalidad. Sovre baza de teorias syentifikas sin fundamyento i de una voluntad de potensya loka, 6 milyones de Djudyos fueron matados, solo por ke eran Djudyos, konsiderados komo kriansas inferyores sin dinyidad ni ningun derecho a la vida.
Este periodo eskuro de la Istorya Umana tromatizo profundamente el prezidente Fransez i su lucha fue de todo tyempo fuerte afin de venser el rasizmo, antisemitizmo i vyolasyon de las grandes valores de la sivilizasyon, bazadas partikularmente sovre la “akseptasyon i el respekto del otro.”
Desde el prinsipyo de su primer mandato el persistyo a azer la luz sovre la parte de responsabilidad de la Fransya de Vichy en la deportasyon i el masakro de munchos kompatriotos Djudyos . El fue el primer i el solo Shefe de governo Fransez ke tuvo el koraje de asumir frankamente la kulpabilita de su payis en esta epoka, i aktualmente el onora los ke individualmente, kon muncha modestia i simplisidad, sin ningun eskopo personal, metyeron sus dias en peligro afin de salvar inosentes en el apreto.
Jacques Chirac tuvo la intuisyon ke es kada dia, kada minuto, ke kale luchar por la konservasyon de las valores umanas, kontra los ekstremizmos i sovre todo kontra la indiferensya. El mos ensenya ke no es en kayandomos ke puedemos azer despareser las markas de una kulpa ma al kontraryo en denunsyandola i en akseptando de asumir korajozamente la parte de responsabilidad ke mos kae, afin ke no se repete mas.
No se puede nyegar ke la posibilidad de amenguar la gravidad de un krimen no se topa en el olvido ma solo en la voluntad de reparar.
