La ventana de vuestra ermana

Şeli GAON

Keridos Lektores,

Oy, vos kero kontar una eksperiensa fabulosa ke pasimos antes una semana, kon mi marido i amigos a la okazyon de una envitasyon.
Alhad ultimo; unos amigos ke konosimos en el viaje de Karadeniz, mos envitaron a sus kazas ke es en Polonezköy.
Mos metimos al kamino; pasimos de las vedruras i villas, i arivimos a un lugar de 3000m2. ande muestro amigo ke es arkitekto; fondyo su fabrika; ande esta fabrikando los kuadros de las ventanas de tavla.
Allado de la fabrika fondyo su kaza i su guerta ande esta kultivando; tomates, kalavasas, pipinos, prichil, frutas, limones i munchas otras kozas.
El es un antikaryo ke esta arekojyendo de sinkuenta anyos para aki; todo lo ke vos puedej imajinar.
En el espasyo a la entrada; tres arabas presyozas de 20ᆭ anyos, una allado de otra. Para entrar a su kaza; mos paso por una puerta ande suvimos una eskalera bastante alta para ayegar a un salon muy grande ke lo esta utilizando komo “SHOW ROOM”.
Mos envito a dar detalyos enriva de lo ke se topa en esta kamareta ke paresiya a un museo de nostaljia, todo muy limpyo, byen antretenido i briyando.
Este amigo es un artisto de muncha abilidad, seya en su ofisyo, seya en  kapachitad de mano.
Su lavor de mano es enklinar la tavla para konstruisir las puertas de las kazas, las ventanas, el tejado i todo lo ke se topa en una kaza.
Teniya una maket de un bloko de kazas, (site) kon todo djusto; la guerta kon la pisina delantre las kazas, i todo los detalyos.
Kon su karakter kreativo el fabriko todo lo ke teniya de menester i lo ke le aziya plazer para azer un objeto.
A el le plaze reparar, restorar los furnimyentos ke tyenen menester de adovarsen.
El fondyo un museo de nostaljia para ke las personas se akodren de todo modo de objetos dal tyempo. Es un hobi para el de arekojer i merkar kozas vyejas.
Kaminimos kaji dos oras ke no es bastante, ma la mujer mos estava asperando a komer i el tyempo paso komo agua.
En la entrada a la syedra; puertas de las sivilizasyones antiguas islamikas de l’Anatolya ke sovre eyas aviya fotografias enteresantes de los anyos 1300񮍈.
Allado de las puertas makinas de fotografiyas, telefones vyejos, makina de sinema ke se amostrava en la pared, mikroskop, teleskop todos los modeles de antes sinkuenta anyos i mas...
Makinas de eskrivir (daktilo), radyos, pikapes, teypes de muestra chikes; el famoso teyp Teka 21, un otro teyp kon makaras grandes de marka Grundig muy pezgado, oras de pared, makinas de kalkole, turbines, asendador, makinas de kuzir, i una makina Singer de kuzir ke se aboltava kon la mano; ke data del anyo 1886 i la alkuza de azete (yağdanlık) de la makina allado. Todo lavorando i todo limpyo.
A la derecha; un sorte de armas muy diferentes para matar a las bestyas komo; lievros, renares, leones, gazelas (ceylan) i otros....
En un kanton un kufero entero de nakra (sedef) ande se metiya el achugar de las ijas.
En un tavlado; lampas de gaz, Kafes de pacharos, i abasho del tavlado una makina muy grande de imprimeria (matbaa) ke esta lavorando mizmo oy. Una tavla bastante larga, ande se metiya panes para dar al orno kon nidos redondos.
Delantre de una ventana; un mupak ande me akodri de mi chikes. El mulino de kafe ande se mulinava las pipitas d’el kafe ke goliya al miskle. En la otra partida del mupak aviya; el mortero de kovre, los pirones, kuchiyos i kucharas dal tyempo, kucharones para la supa, el tropito, el rayo de kezo, el prespure (makina para esprimir la patata), el molino de karne, librik de kovre, i otras kozas...
En otra partida aviya los modeles vyejos de kalsados para azer ski, ke eran muy pezgados, bolsas trikotadas ande se metiya paras, un org vyejo kon su siya ande me asenti i tanyi unas kuantas kantikas ke me aviya ambezado en mi chikes.
Veramente mos izo grande plazer de vijitar este museo i despues pasimos a la kaza de dos etajes para komer.
Delantre de una soba de lenya antigua kemando muy fuerte; una meza byen ornada kon kozas espesyales i el vino de dyes anyos.
La konversasyon enteresante i kayente kontinuo fina medya noche.
Pasimos una tadrada muy agradavle; i los envitimos a muestra kaza en remersyandolos de sus resivos ospitalyeros.