Rav Yeuda ADONİSigun konta en la peraşa de la semana pasada en el entervalo de un anyo, mando el dyo dyez yagaz una mas fuerte. Ke otra a el Ejipto. Enprimero se trokaron las aguas en sangre, i muryeron. Los peşkados del riyo. Despues se muçiguaron en el riyo. Las ranas, ke salyeron de las aguas i kavzaron munços danyos en la tyera. İse konkriyo piyojos muy donyozos I se ve unos animales krueles i uvo una muertaldad en las kuatropeas ke izo munço danyo. Una fuerte sarna les vino a todos los ejipsyanos asta no pueder süportar i uvo un buen pedrisko ke danyo todas los frutos del kanpo.
I en la perşa “Bo” de esta semana meldamos la kontinuasyon de la yagas ke son la langosta. Ke baryo todo lo sembrado. Despues les mando el Dyo una fuerte i espesa eskuridad ke turo tres diyas i tres noçes de una manera ke los izo kevrantar munço, syendo no se puediyan meneyar, kada uno de su luguar. Todos estos males fue süportando el kruel paro en tal de estar en su kapriço i no mandar a los cudyos de su tyera.
Kuando se apezgava la fortaleza de la yaga sovre el i su puevlo, ya paresiya ke iva ablandar su korason i ya prometiya de dar la libertad a los cudyos. Apenas kalmava la yaga i teniya un poko repozo, se enduresiya su korason. De esta manera süporto paro i todo su puevlo estas mueve yagas myentres ke todos los cudyos, estando mismo mesklados kon los ejipsyanos no teniyan ningun mal.
La dyezena yaga (makat behorot) ne pudo süportar asta el kavo, despues de sufriyir bastante ke todos los ijos meyores (behorot) de los ejispyanos, de çiko asta grande, fin el ijo de paro, muryeron todos de una en la medya noçe i fue forsado paro de parte su puevlo de yamar en akel momento a Moşe i a Aaron rogarles ke salyeran eyos i todos los cudyos del Ejipto, i ke rogdran por su vida.
En la medya noçe del 15 Nisan de este anyo, mando a dizir a todo el puevlo cudyo ke se topavan en la tyerra de Goşen. Ke eyos eran liberos i ke puediyan salir de su pais. Los cudyos ke ya estavan prontos esperando esta ora; se rekojeron todos kon prisa en Ramses. A la manyana enel 15 Nisan salyeron todos los cudyos del ejipto kon grande koraje i alegriya despues de aver estado en el ejipto 210 anyos.
La suma del puevlo ke salyeron del ejipto era 600 mil almas de ombres de 20 anyos para ariva, endesparte de mansevos manko de 20 anyos i de mujeres i kreaturas.
Los ejipsyanes konosyendo a los kavos la grande encustisya ke kometyeron kon los cudyos, i tambien ke vyeron ke ay dyo en los syelos, ke paga a kada uno sigun sus eças, kijeron afalagarsen un poka kon eyos, i fueron regalandoles munça plata i oro i pyedras presyozas i munças kozas valutozas i les aziyan demandan todo lo ke teniyan menester. Ansi salyeron los cudyos de mistrayim kon munça rikeza. Sigun sela prometyo el todo poderozo a Avraam. Kuando le avizo lo ke teniya ke arivar a sus ijos. Komo esta eskrito enel livro bereşit kapitolo 15 “İ dişo a Avram, saver sepas ke tu semen sera peligrino en tyera ke no es suya, i los aran sirvir, i los afriyiran. I tambien a la cente ke los izyeron sirvir cuzgare yo, i despues de esto saldran kon ganansya grande.
