Novelas... Novelas...

Fragmentos de vida
Debasho el syelo velado de tristeza, kon envezes chikas luzes ke dezaparesen a penas vizivles, el mundo va su kamino, raramente kudyozo i klemente, ma lo mas indiferente, duro i sodro

En Israel, situasyones raras en la Istorya Universal: Aunke muy regretavle i mizmo muy triste,ma en un esprito de ekidad absoluta, kon muncha dinyidad, el puevlo Israelyano tyene aktualmente el merito i el koraje de denunsyar i kritikar avyertamente sus dirijentes en fonksyon, por sujetos personales... bushkida de la verdad leshos de todo modo de influensa.
Independyente de este evenemento, un Sitizano Arabo-Israelyano “Ralib Macadele” fue nominado myembro del Governo egzegutivo de Israel, afirmasyon absoluta del esprito demokratiko en una epoka de peligro i de grandes dlflkultades.
Lunes 29/1/2007 de muevo la muerte, de muevo un atentado terroristo en Eilath.
Vyernes el 26/1/2007: La asamblea jeneral de la ONU adopto una rezolusyon kondenando formalmente la negasyon del Holokosto. Primera grande viktorya kontra el negasyonizmo i el anti-Judaizmo. Salvo el Embashador Iranyano ke la arrondjo kon vehemensya, la mosyon fue akseptada kaji a la unanimidad.
Shabat el 27/1/2007: Grande seremonia en Polonya para komemorar i selebrar el 65en anniversaryo de la liberasyon por los Rusos del kampo de la muerte Auschwitz-Birkenau ande fueron eksterminados un milyon i syen mil (1.100.000) mujeres, ombres i ninyos, entre los kualos la mayoria era kompuesta de djudyos.
A esta okazyon la emisarya del Prezidente de la Republika Poloneza deklaro ke ‘Komunidades’ enteras fueron eksterminadas i ansi la sivilizasyon Djudia del sentro de la Evropa dezaparesyo...”
Alhad el 28/1/2007: Anunsyo de los Funerales de Sarika Lizi Levi.
Sarika Lizi Levi muryo despues de una kurta vida ma una larga lucha kontra la sufriensa, entornada de kerensya i de amor.
Ke su alma repoze en paz.
A todos sus serkanos muestro profundo respekto i la komprensyon de sus dolor.
Lunes el 29/1/2007: Dos ermozos rayos de luz. Vengo de resivir dos muy ermozos rekolyos de kuentos, el uno de muestra amiga Matilda Koen Sarano intitulado: ‘Vejes Liviana’, el otro en Fransez, kuentos Judeo-Espanyoles de varios eskritores entre los kualos İsac Moskana, Dr. Gad Nassi, Yoshuah Grasiani, Marie Christine Varol etc...etc..traduzidos i adaptados por Vanesa Pfister –Mesavayo, i maraviyozamente ilustrados por muestra kompatriota Sandra Albukrek Sebban.
No mankaremos de darvos un kuento rendido mas detalyado sovre estas dos ovras en una de muestras proksimas publikasyones..