30 o 40 anyos antes, meldavamos sus eskritas en la prensa, artikolos profundos en sus temas komo en sus analizes de diferentes situasyones. Kon su ancha kultura, su formasyon filozofika i sovre todo su grande sensibilidad, el formulava komentaryos sinseros de grande kualidad i fue ansi uno de los giadores de la manseves de su epoka.
Tambyen, kuando el tenia la karga del portofolyo de los echos estranjeros de Turkia, kon su fuerte personalidad, su vizyon i su perfekta komprensyon de la situasyon Internasyonal, Ismail Cem avyo puertas ke paresian ser serradas por syempre.
El defundo yevava en el un proyekto echo en mizmo tyempo de lusididad i de voluntad de konkordansya. Sin nunka nada sakrifikar de los interesos de su payis, el supo syempre tomar en konsiderasyon ke los otros tambyen tenian el derecho i el dever de defender los suyos..
Es en la dolor, en estos momentos ande no se tyene mas nada a asperar de ninguno ke se ve verdaderamente la novlesa i la fuersa de karakter de una persona. Personalmente, no lo konosi de serka ma syendo la vezina de su ija, tuve munchas vezes la okazyon de enkontrarlo durante el largo periodo de su hazinura... El era syempre la mizma persona kalma kon una syerta serenidad en la ekspresyon de la kara i sovre todo atentivo a no disturbar ninguno; la karakteristika la mas vizivle de su personalidad era djustamente la noblesa, esta noblesa ke tenia en sus pensadas, aktos i tambyen djestos de kada dia.
Su vida fue una grande lucha para realizar sus teorias umanistas bazadas sovre el respekto del otro i la avyertura verso el mundo eksteryor sin por esto renunsyar a las valores ansestrales de su propyo puevlo...una lucha para la evolusyon i el adelantamyento kontinual, para la rezolusyon de los problemas en la paz, ansi ke para la vıktorya de la amistad kontra la enemistad i de la verdad kontra la mentira.
Ke su alma repoze en paz i sus ermozas ideas enfloreskan en el esprito de muestro puevlo i de toda la umanidad.
