K.P.Alhad pasado, dodje dias despues la muerte de Hrant Dink, en el suplemento del kotidyano “Hürriyet”, fotografias vyejas de 10 a 15 anyos, el i su mujer entornados de sus tres kriaturas, la kara resplandesyente de alegria, la kavesa por seguro yena de proyektos a realizar i el korason de kerensya i esperansa...en una sola,la ultima, Rakele sola kon sus ijos i su ermuera.
Komemorar el Holokosto komo lo azemos en Pesah
Dora NİYEGO
En el anyo 1997, un grupo de entlektueles ke sufrieron del Holokosto,se asamblaron para kompartir sus butos. Estos butos eran de ensenyar i transporar la trajediya del Holokosto a las jenerasyones futures. Eyos pensaron ke kon tiempo, duspues ke los survivoros del Holokosto se vana murir, el Holokosto no va tener mas dinguna sinyifikasyon por las jenerasyones futures. Por esta razon, los myembros de este grupo fondaron una organizasyon i le dieron el nombre “El Projekto de la Kaza de la Komemorasyon del Holokosto”. La misyon de esta organizasyon fue de motivar el puevlo para ke partisipen a este projekto. El nombre de esta organizasyon se troko munchas vezes. Emprimero la yamaron “Zachor” (“Akodrate” en Ebreo), mas duspues le dieron el nombre “De la Memoria a la Aksyon”. Duspues tres anyos de lavoro, esta organizasyon aparejo un livro manual para motivar el puevlo para tomar prekosyones a la diskriminasyon i opozarsen a todo modo de predjudizmo i maltratamiento en sus komunitades.
Este livro ke fue publikado por la primera vez en el anyo 2000, prokur munchas enformasyones sovre el Holokosto. El objekto de este livro es de motivar los partisipantes para aparejar un evenemiento sosyal. Este evenemiento sosyal ke este grupo propozo en este livro es de reunir seines de partisipantes, en chikos grupos en diferentes lokales, al derredor de una meza, kon komidas simbolikas i kon rituales (komo lo azemos en la Agada de Pesah) i komemorar el Holokosto en una komida kompartida.
El objekto de este evenemiento es de rekodrar el Holokosto (komo rekordamos la salida de Misraim en Pesah) i de ayudar a evitar los jeneosidios futures. En edukando la manseves sovre el Holokosto i los otros jeneosidios, sin apartar dinguana rasa i dinguna relijion, puedemos mijorar todo modo de komunitad, ambezandoles a akseptar la diferensia entre las personas, evitar la diskriminasyon, el maltratamiento i la violansia kontra los ke son diferentes.
Empesar a gerreyar kon el predjudizmo antes ke ampese, edukar los mansevos a defender sus dirritos, es el buto de esta organizasyon.
Inyegar el Holokosto es la konsekuensia de la inyoransia. El Holokosto no es solo un evenemiento historiko. Komemorar el Holokosto es en mezmo tiempo una okazyon para edukar las jenerasyones futures a tomar egzamplo de esta trajediya.
