Los dirijadores de muestra komunidad , los prezidentes de kada asosiyasyon, el Prezidente de la komunidad djudiya, el Grand Rabin , el Segundo Konsul de Israel, todos los vyejos partisipantes de la Sinagoga, los envitados de todas las komunidades de Estambol asistieron a la seremoniya.
Las kreaturas del Koro de Talmud Torah resivieron al Grand Rabin kon la kantika “Baruch Aba” (Seygas la Bienvenida).
La seremoniya empeso kon el deskorso del Prezidente de la Komunidad de Kadikoy- Haydarpasha, Mordo Kumrulukush. En su deskorso Kumrulukush mos ekspliko las konstruksiyones adisyoneles de esta Sinagoga ke tiene sien i ocho anyos; mos avlo de los eforsos de la administrasyon, todos estos eforsos siendo porke las plantas ke estomos ensembrando (sinyifikando muestras kreaturas) se developen, den raizes, i ansi, puederemos sumeter muestra komunidad en manos mansevas.
Rav. Leon Adoni prononso un deskorso nostaljiko, sitando los nombres de todos los rabinos ke dyeron deskorsos en esta Sinagoga en las fiestas de Tu Bishvat. Kada anyo, el diya de Tu Bishvat, el puevlo de enfrente pasavan a Kadikoy kon vapores para asistir a la seremoniya.
Rav Adoni mos avlo de la sinyifikasyon de la fiesta de Tu Bishvat. “ Kuando las personas se aleshan de un lugar, las plantas no kresen mas en este lugar. Las personas biven kon las plantas, i las plantas biven kon las personas. Kuando el Dio kreyo el Ganeden, le disho al ombre “Yo kreyi estas plantas, tu deves de konservarlas. Vaza ensembrar muevos arvoles por las futures jenerasyones”. Kada noche de Tu Bishvat komemos diferentes frutas en dizyendo su Beraha.. Kada fruta tiene una sinyifikasyon por la persona. La fruta es atada a su arvole. Kada famiya es komo un arvole, no desha nunka sus kreaturas i los engrandese transmetyendoles sus tradisyones.
Un elevo de Talmud Torah dirijo su palavra a la asistensia dizyendo ke las fiestas son sinyifikantes porke unifikan los djudios en el mundo entero.” En los lugares ke oy mozotros estomos asentados, anyos antes, muestros padres i madres estavan asentados. Kada anyo, Talmud Torah va kontinuar a azer grandes eforsos para fiestar Tu Bishvat en esta Sinagoga kon grande alegriya. El Koro de Talmud Torah, kada anyo, se esta developando komo una planta mueva nasida’.
La ovra de teatro ke los myembros de Talmud Torah prezentaron, fue muy gustada por todos los partisipantes. El mansevo ke djugo el rolo del arvole de mansanas tomo una kreatura en sus brasos i la kuno. A una otra kreatura menesteroza, le dyo sus mansanas para ke las venda i gane paras. A un guerfaniko ke no tiene kaza, le dyo sus branchas para ke se aga un nido; i a una otra kreatura, le dyo su tronko para ke lo korte i ke se aga una barka, ma kon la kondisyon de ensembrar muevos arvoles de sus plantas muevas nasidas.
El Prezidente de Talmud Torah, Selim Azuz, mos konto la konseja selebre de Tu Bishvat, la konseja de Honi. En su deskorso, Azuz mos dyo un mesaje sinyifikante dizyendo ke las komunidades del mundo ensembran sus frutas (sinyifyando kreaturas) por formar las komunidades futuras.
El Prezidente de la Komunidad Djudia de la Turkiya, Silvyo Ovadya eksprimo su alegriya de ver tanta djente en la Sinagoga de Haydarpasha en este diya de fiesta. “Los myembros muevos de la administrasyon i los eforsos de la Asosiasyon de Goztepe son el kavzo de esta reushita” disho Ovadya. Mas duspues, Ovadya remersyo al filantropisto Albert Levi por sus kontribusyones a la Sinagoga Hemdat Israel.
El Grand Rabino Izak Haleva empeso su deskorso kon una Beraha. Segun Haleva “La istorya es una repetisyon. Komemoramos el pasado en fiestando los evenemientos alegres i nombrando los evenemientos tristes. Ma esta fiesta no es istorika. Tu Bishvat mos ata a la natura i a la vida aktuel. Tu Bishvat es la fiesta de los arvoles. Las plantas son la alma de muestra vida. Las plantas toman el karbondioksit del ayre ke es la materya ke mos toksina, i mos da el oksijen, la materya ke mos aze bivir. De aki estomos viendo, komo esta fiesta es tanto emportante por muestra vida. Noche de Shabbat, Tu Bishvat se fiesto en kada kaza djudia i ansi embezimos a muestras kreaturas la emportansia de los arvoles i de las plantas aparejando muestras kreaturas a la vida komo enjenyores de agrikultura. Tu Bishvat mos akodra ke el Dio es el Kreador. Los arvoles kedan empies grasias a sus ojas. Kuando las ojas kayen del arvole, se ameresiyan i se mueren. Muestra komunidad esta empies grasias a muestras tradisyones. Si kedamos atados a muestras tradisyones, dinguna fuersa no va pueder destruir muestra unidad”.
