Dora NİYEGODiya de Alhad`, el kuatro del Febrero (Shevat), la fiesta de Tu Bishvat se selebro en la Sinagoga de Haydarpasha komo kada anyo. Ma este anyo, Tu Bishvat se selebro kon mas grande entuziazmo porke mas muncha djente de kada anyo partisiparon a la seremoniya.
Şeli GAON
Keridos Lektores,
Noche Shabat el 02.02.2007; el muevo presidente de la fondasyon Neve Shalom, JOJO NASİ; envito al Grande Rabino kon la rubisa, a los dirijentes de Neve Shalom kon los dirijentes dela Matan Baseter-Barınyurt, a los hazanes i a todos los presidentes vyejos kon sus famiyas, ijos, ijas, madres i padres todos endjuntos para selebrar la fyesta de Tu-Bishvat en este lugar sakro.
Fue una nochada muy reushida; de unyon i de solidaridad.
Despues las orasyones en la sinagoga, mos envitaron a komer al salon ande se aze las fyestas.
Eramos kaji syen personas, las mezas enderechadas kon un hen maraviyozo, ornadas de rozas, los manteles blankos komo la inyeve. Todos mos asentimos unos en frente de otros, di ke paresiya ke estavamos en una boda.
Despues d’el Kidush; empesaron a sirvirmos. El catering kosher de Barınyurt ekstraordinaryo.
Yo penso ke en Estambol no ay un catering mas reuchido del Barınyurt ; mizmo los oteles grandes no pueden alkansar a aparejar estos modos diferentes de dulsuryas, salados, komidas i otras kozas metikulozamente (titiz).
Kuando komimos el peshkado kon agristada muy savrozo, ke es la korona de la komida de Shabat; mos sirvyeron; karne, zarzavat, aros, salata i dulsuryas.
A la fin d’el komer, el Grande Rabino Rav. İshak Haleva empeso las berahotes de Tu-Bishvat, kon las kantikas i komyendo lo ke se deve de komer.
Tu-Bishvat ez el 15 d’el mez de Shevat. La mueva anyada de los arvoles. El empisijo de la primavera. Se empesa a ensembrar muevos arvoles de este momento adelantre.
Fue una nochada yena de intimidad, kerensya i kayentor.
El Grande Rabino eksprimyo sus sentimyentos en dizyendo ke enfrente de esta vista maraviyoza todos kon sus famiyas; se akodro de antes sinkuenta anyos, kuando biviya serka de esta sinagoga; komo biviyan los djudyos akel tyempo, mas aunados kon las famiyas i mas modestos.
En esto lo remersyo al Presidente Jojo Nasi ke organizo esta nochada inolvidavle.
Esto; me izo akodrar una istorya verdadera ke kero partajarla kon vozotros.
En el tyempo de la Shoah; kuando yevaron a los djudios de la Evropa a los kampos de konsentrasyon; munchas famiyas djudias; aviyan entregados los ijikos chikitikos i los muevos nasidos (para ke puedan bivir) a los monasteryos.
En esta manera, munchas kriyaturas se salvaron de murirsen.
Kuando la gerra se termino, i los nazis eskaparon de detruisir a los djudios; las organizasyones djudias d’el mundo entero; empesaron a bushkar a estas kriyaturas.
En la presidensya de Rav Silver i Rav Gorfinkel kon una delegasyon ke arivo de los Estados Unidos; empesaron a vijitar los monasteryos en la Almanya, en la Polonya i en otros paises de la Evropa.
El dirijente d’el monasteryo le demando kon una boz muy seryoza a Rav Silver: “Komo estaj pensando de topar los djudios entre tantas kriyaturas?”
El Rav le respondyo: “puedemos entender de los nombres”.
Emposible disho el dirijente; si no tenej indisyos definitivos (kesin delil) yo no vos do ni una persona. Por exempyo el nombre Miller puede ser djudio, u puede ser polonezo u almano.
No puedej topar kon los nombres.
Los dos Raves muy tristes i abatidos; empesaron a orasyonar para ke el todo el Puederoso les ayude.
En supito; le vino al tino una idea briyante del Rav Silver.
Lo yamo al dirijente i le demando si pueden vinir kuando las kriyaturas se van a echar por la noche.
El dirijente ya aksepto i kuando vino las oras de echar; la delegasyon entro al dormitoryo (yatakhane).
Todas las kriyaturas kon un orden entraron a sus kamas. Djusto en este momento; Rav Silver se suvyo enriva de una siya i empeso a meldar kon boz alta esta orasyon:
ŞEMA YİSRAEL AD... ELOkENU AD... EHAD.
Kuando termino de orasyonar; se empeso a oyir bozes flakas i bozes en yorando de munchas kamas.
Munchas kriyaturas dizyendo mama, mama se estavan lamentando kon impo de yoro. Les aviya paresido ke esta orasyon no era de la boka d’el rav ma de sus madres keridas ke estavan en sus kaveseras.
Akeyas madres ke kada noche kuando kuvijavan sus kriyaturas les diziyan i les aziyan dizir esta orasyon:
ŞEMA YİSRAEL AD... ELOkENU AD... EHAD.
El dirijente aksepto este indisyo definitivo.
Esta orasyon divina kavzo ke las kriyaturas kedaron djudios.
Estaremos syempre aunados unos kon los otros, i atados a muestras tradisyones. El Dyo ke mos guadre de las kozas ke no mos puedemos guadrar.
