6 Şubat Salı günü, Barınyurt`da, Cerrahpaşa Tıp Fakültesi Geropsikiyatri Anabilimdalı Başkanı Prof. Dr. Engin Eker “Yaşlılıkta Depresyon ve Bakıcının Tükenmişliği” konulu bir seminer verdi. Katılımcıların son derece yararlı buldukları seminerin notlarını, David Ojalvo`nun derlemesiyle yayınlıyoruz
Şeli GAON
El buketo de viyoletas:
El se yamava Moshe, eya se yamava Rachel. Eran primos. El padre de Rachel se avia iyido a morar a Paris ande era patron de una ermoza fortuna.
El padre de Moshe se avia kedado en la provensya onde bivia kon una moneda limitada . El se avia desidado de embiyar el ijo regalado a Paris para ke aga sus estudyos aya. Le embiyava una moneda kontada kada mez.
Moshe amava su prima, i ya se lo avia dicho. Rachel amava a su primo, ya se lo avia deshado entender.
Moshe mansevo delikado i responsavle, pagava antes de todo su mezada de su kamareta, merkava bilyetos de abonamiyento de komer por todo el mez i despues sovre lo ke le kedava metiya syempre aparte pyesas destinadas a komprar el buketo ke ofresia kada dia a su prima, en azyendole su vijita de las 5 a las 6 la ora de la tadre.
Rachel avia deshado entender a Moshe ke lo amava, i aki en ke manera:
Kada tadre Rachel, en tomando el buketo del dia, rendia a Moshe su buketo del dia de antes.
İ de donde lo kitava por remeterlo a Moshe?
De sovre su seno. İ Moshe apretava sovre sus lavyos este buketo yeno de virjinal guesmo de akea ke amava.
Rachel le demandava “me amas” kuando resivia el buketo i Moshe le respondia “si”.
Ma esto no abastava a Moshe, el dezeava i esperava un bezo fyevrozo, el kazamyento de los lavyos porke estava pasyonado de la amor de su prima. Kada tadre tornava triste.
Avia tres mezes, ke se vian kada tadre. Syendo ke la primera vijita ke le izo fue el 1 Jenaro, ya avia alkansado el 31 de Marso, i tan byen ke el povre estudyante tuvyera pasado ekonomikamente el mez, no le restava, el dia del 31, mas ke los ultimos soldos destinados a la komprida del buketo de viyoletas.
El no era por esto muy triste. El dia de antes,en rendyendole su buketo, Rachel estuvo muy buena, i ya avia avlado una ora kon el, la mano en la mano, i le avlo de tan serka ke, si no tokava sus karas al menos sintia el veludo de su kuero, i si no avia tokado sus lavyos al menos el respirava del mesmo ayre ke avia sido respirado de eya.
En rendyendose Moshe el 31 ande Rachel, Moshe la kavesa en alto komo un amorozo trionfante, o sovre el punto de trionfar, avia bushkado en todo su kamino una vendedera de rozas de la kual podyera kumplir su regalo del dia. Ya avia arivado a la punta de la kaleja de Rachel, kuando atino serka la puerta de la ke amava, por una parte una vendedora de rozas i por otra una mujer povereta tenyendo un ninyo enfirmo en sus brasos.
Moshe el korason apretado, dyo la espalda a la povereta, se aserko de la vendedera de rozas i eskojyo el mas fresko buketo de viyoletas; ma en lo ke iva pagar la moneda :
“Piadad, si vos plaze, mi buen sinyor! Le grito la povra sedakera, por mi chiko ninyo!...”
Moshe entonses la miro, la vido flaka, ke su chiko ninyo mas flako i mas palido de eya.
Esta vista lo echo en una grande tristeza : si no da buketo, no ay el bezo tanto dezeado!
Por tanto, el desho kayer el buketo en el sesto de la vendedera i dyo la moneda a la sedakera.
Despues, el suvyo la eskalera, i sono a la puerta de la ke amava.
Fue Rachel ke vino avrirle la puerta. Antes ke el retornara de su enkantamyento, la inosente muchacha se echo sovre su garganta i lo abraso.
İ myentres ke el bushkava a entender la kavza de tanta felisitad :
-No bushkes, le disho eya, ya vide!....
La kerensya es un sentimyento ke las personas no se pueden arrepentirsen de esta amor sakra.
Yo penso ke; todas las problemas de la umanitad se van a resolvar, kuando mos va mos a ambezar a kerer byen las personas unas kon las otras resiprokamente.
Esto ogurando un mundo kon pas, yeno de respekto i Kerensya.
Esto felisitando el 14 febrayo este diya espesyal; no solo por los amantes, ma; para todas las personas ke se keren byen i ke se kergan byen.
