UNA TRAJEDİYA DE ANTES 65 ANYOS...

Coya DELEVİ

(12 Desembre 1941 - 24 Febrero 1942)

Kero ampesar kon un rekuerdo de mi chikez. Fin del anyo 41 i empesijo del 42... Yo aviya apenas eskapado mis ocho (8) anyos. Malgrado mi chikez, fue esta epoka ke me desho lo mas de trasas i rekuerdos inombravles. D’otra parte, mi edad no me permetiya de realizar i entender la importansa o la sinyifikasyon egzakta de los evenimyentos trajikos ke estavamos bivyendo.
Portanto, komo munchas kozas de la epoka, el nombre de “STRUMA” kedo gravado en mi memorya. Moravamos en Galata, un etaj bastante alto, en el Saffet Bey Apt., ke tanto nombri en mis rekuerdos. Seya de muestra ventana, seya de la grande tarasa del techo, teniyamos una vista muy ancha, inkluzo i Sarayburnu... D’este punto de vista, sin konoser la realidad, yo estuve vyendo el “Struma”, todo el tyempo ke estuvo ankorado ayi (demirlemiş).
Sinti komentaryos kontradiktoryos, por lo mas yerrados ( lo entendi munchos anyos despues).
Era la epoka ke mi papa estava azyendo el servisyo de rezervisto (las 20 klasas). No teniya a ken demandar, malgrado mi kuryozidad. Anyos pasando, mi padre, komo uzava syempre, me dyo syertas enformasyones... Siguro asigun lo saviya i el, kero dezir, no muy egzaktas... Puede ser ke es achakes de esta “malinformasyon”, “Struma” kedo kon puntos de interrogasyon i me pusho a azer investigasyones.
“STRUMA era un nave alkilado por los Djudios de Rumaniya, pais ofisyalmente antisemit a la epoka. Durante la Sigunda Gerra Mundial, el nave iva transportar los emigrantes Djudios a Palestina, akel tyempo debasho el kontrol de los İnglezes. “Struma” fue torpilyado i undido (batırıldı) por un sumaren (denizaltı) Sovyetiko, el Shchuka 213, el 24 de Febrero 1942, kavzando la muerte de 768 almas (1*) 
Por anyos, uvo diversas teoriyas, sovre la eksplozyon ke kavzo la fin de “Struma”. Fue solamente en 1964, ke un istoryano Aleman, pretendyo deskuvrir el responsavle de esta trajediya: un nave sumaren Ruso. Mas despues esto fue achetado i konfirmado por diversos manaderos Sovyetikos, ke eksplikaron tambyen las razones del governo Ruso de la epoka.
En Julio 2000, un grupo de investigatores Turkos, deskuvriyeron una ruvina en el fondo de la kosta supozada ser aproksimativamente el lugar egzakto. Ni esta, ni otras bushkidades en la rejyon, no dyeron rezultados satizfezyentes, i no se pudo identifyar el “Struma”.
“En el 3 de Septembre 2000 se organizo una seremoniya de komemorasyon de la trajediya.Partisiparon 60 serkanos de las viktimas de “Struma”. Un reprezentante del governo Israelyano, el Ambasador de este pais, reprezentantes de la Komunidad Djudia de Turkiya, ansi ke delegados Britanikos i Amerikanos fueron prezente en la seremoniya.”(1*)
Entre el 12de Desembre 1941 i el 24 de Febrero 1942, el nave fue detenido en Estambol, serka Sarayburnu, myentres las negosyanones entre los governos Britanikos i Turkos. Negosyasyones ke no alkansaron a dingun rezultado. En el 23 de Febrero, a la salida del Bosfor,“Struma”, fue abandonado a su suerte en la Mar Preta (Karadeniz)...

(1*)- En syertos de los paragrafos me aprovechi de “Wikipedia”the free encyclopedia.
P.S-Por detalyos suplemanteryos, el lektor se puede referar a mi artikolo de la pajina “Kavram” del prezente No. del “Şalom”. C.D.