Ninet BİVASEl anyo pasado en Avril, Ihu Beja mato a su mujer i se suisido. En Desembre 2006 un Etiopyano de 47 anyos de Holon mato a su mujer i kijo suisidarse. La situasyon se esta azyendo mas negra de diya en diya i dingunos no estan pudyendo azer nada.
Deke estas violensyas tienen parte en las mas chika komunidad de Israel? En Etiopia las mujeres eran aharvadas ma no eran matadas. La kestyon es un fenomen spesial en Israel. Kualo es la razon?
Solamente provedad, poka edukasyon i las tradisyones modernas estan destruyendo la vida familyal de los judyos Etiopianos. Estuvyeron forsados de abandonar sus tradisyones i auzarsen a las tradisyones modernas. Esto trusho rezultados muy trajik en la vida de los Etiopianos. Mas muncho kriminales i matadores potensial.
Kualo se puede azer? Lo mijor es dechar Etiopianos ayudar otros Etiopianos. En la tradisyon Etiopiana los aedados tienen mas muncha eksperyensa de la vida i se toma konsejos de eyos. En Etiopia kuando mujer i marido se peleyan los aedados intervienen. Estas personas konosen la mentalita de sus centes porke viyenen de la mizma komunita. El buto prensipal de los aedados konsejeros es de azer pas entre marido i mujer i azerlos bivir en armonia. Eyos saven ke si se separan vana regretar dospuez.
En Israel los ayudantes sosiales remplasaron los aedados. Frekuentamente konsejan la separasyon i se azen parte del problem. La kriza de famiya entre los Etiopianos se puede solver en tomando komo konsejeros a los Etiopianos aedados.
(Transledado de Jerusalem Post)
