Tener una buena konversasyon

Coya DELEVİ
Antes tres siglos, un eskrivano Fransez, Saint Evremond, disho: “La konversasyon syendo el medyo ke ata la sosyedad, es kon eya ke se rije el dar i tomar de la vida sivil, ke las personas se komunikan las ideas ke los korasones se ekspriman, i las amistades ampesan i se konservan.”
El arte de konversar demanda syertas vertudes. En prensipyo, se deve posedar un minimum de kultura jeneral, (siguro lo demaziya no aze danyo!) un meoyo bivo i urbanisto. Esto todo akompanyado de una boz, mas o menos agradavle, i un dono de komunikasyon kon el d’enfrente. La mas parte de las konversasyones son monologos. Uno avla, i, los otros asperan la okazyon de dezir unos doz byervos. Komo disho Montaigne: “La palavra es mitad de la persona ke avla, mitad de la ke syente.”
Sin tener un talento espesyal, puedesh ganar la reputasyon de konversador!..Ke manera? Un chiko sekreto: basta saver oryentar vuestro interlokutor verso un sujeto en el kual, el, es ekselente. Naturalmente, i vozotros, devesh tener a lo menos, una konosensya. En kavzo kontraryo, vos puedesh enfasyar un poko! En un  sujeto ke no konosesh vos puedesh topar en difikultad tambyen. De vez en kuando, demandash a vuestro interlokutor, syertos detalyos, syertas presizyones. De esta manera, va entender ke vos enteresatesh al sujeto. Alora, estad siguro, ke el (o eya) vos dira: “Sinyor-o sinyora-, tuve grande plazer de de vuestra briyante konversasyon.”
Sin ser un fenomeno, se puede fasilmente avlar de diversos sujetos. Basta ke se tome la pena de enrikeser la kultura jeneral, meldando, estando al koryente de la aktualidad. Es tambyen importante de estableser un koryente de simpatiya. En una konversasyon, es evidente ke devemos eskojer los byervos djustos i mezmo simples, ke ekspriman muestra idea. No ay menester de emplear palavras komplikadas o sofistikadas, para mostrar ke sosh kultivados! Se deve bushkar byervos apartenyendo mas o menos, a la terminolojiya de los ke mos estan sintyendo, para ke puedan entender lo ke estamos dizyendo. No kale olvidar los diversos grados de kultura, lo ke es normal...
Esto, lo estamos bivyendo aktualmente, en el Ladino. Munchos, estan keshozos de no entender muy bueno lo ke estamos eskrivyendo en esta lingua. I, estas personas avlaron el J-Espanyol, toda sus vidas…Entre amigas afilu, es preferavle de no tener la uzansa de byervos “argo.” Tambyen, se deve azer atansyon a byen prononsar las palavras. Moliere disho: “Se syente mal, lo ke kreemos aver byen oido!” Si se trata de un sujeto grave, evitad de mesklar shakas i “espris.” Pueden ser mal interpretados. No savemos syempre, si el d’enfrente, es kapavle de apartar…
En una konversasyon, devemos amostrar muestro entereso i sintir la persona ke esta avlando. Es un sinyo de politeza. Es tambyen, provechozo si se trata de una tema enteresante. Komo disho Jussieu: “El ke syente, munchas vezes, emplea su tyempo mijor d’el ke avla!” Un espesyalisto disho ke la koversasyon es una rekreasyon mental. Kada vez ke vash azer deskuvyertas, vash a kerer ke i los otros profiten. Esto vos va dar la okazyon de una konversasyon.
En vezes, tenemos la ovligasyon (en una reunyon, por eg.) de avlar kon ajenos. Ay syertos sujetos klasikos, komo livros, sinema ets…Si, las oras pasando puja! la intimidad, las damas empesan a avlar de moda, reseftas de gizados ets…myentres ke los ombres, preferan el spor, politika?!..Enfin, son sujetos ke dan bastante materyal.
Sin egzajerar, un buen dialogo puede ser konsiderado komo un “arte”. No seriya yerrado de dezir: “Tyene buena konversasyon, por alguno ke poseda la yave de este arte.” I, por eskapar, una refleksyon de LA Rochefoucauld: “El sekreto del plazer en las konversasyones es, no entrar muncho en los detalyos”.