Dora NİYEGOPurim es la fiesta ke mensiona la mirakuloza viktorya de los djudyos derrotando los planos danjerozos de Haman. Esta fiesta alegre revela la Mano del Dio reglando en sekreto las problemas de los djudyos. La mano del Dio esta allado de mozotros sin azerse apersivir.
Şeli GAON
El ocho d’el marso es el dia enternasyonal de las mujeres, es el rekuerdo el dia espesyal de la ganansya de los derechos de la mujer.
En el anyo 1860 las lavorantes de tekstil en New York; kijyeron una vida komo benadam; i lucharon por una vida kon igualidad, sin apartamyento, i tener todo modo de derechos komo los ombres.
Los puevlos unidos O.N.U. en 16.12.1977 dyo la desizyon de fyestar este dia kada anyo el 8.3.
Las mujeres son muy aktivas seya en sus kazas, seya en sus karyeras, saven lo ke keren i arivan a sus butos.
Kon sus kalmedades i entelijensya, reushen en sus profesyones solas u kon sus ekipas.
Enfluensan kon sus avlas dulses, i konvensen al d’enfrente.
Eyas son madres de sus ijos, mujeres de sus maridos, ke tyenen munchas ovligasyones i responsabilitas en sus nidos, estan reushendo en munchos espasyos emportantes.
Eyas koryen a todo modo de kozas, abastesen, kreyen un montante de echos ke es difisil de pensar mizmo.
Oy, munchas mujeres estan en un nivelo igual de los ombres en los espasyos; politikos, ekonomikos, komersyal i volontaryos.
Unos echos ke son emposibles a realizarsen, se pueden solvar kon la entelijensya pratika de las mujeres.
Por egzempyo en l’Amerika ay unos kuantos anyos ke una mujer muy reushida esta represantando el ministeryo del eksteryor.
En esto kero komemorar una de las mas grandes mujeres d’el mundo; ke desho una trasa inolvidavle en la istoria kon su kapachitad, su semplisitad i su kerensya.
En este dia espesyal kero nombrar a esta maraviyoza mujer ke admiri syempre: GOLDA MEİR.
Golda Meir dirijo un pais muy emportante d’el mundo. Rezolvo munchos problemes kon su entelijensya, su dinamizmo i su intuisyon (sezgi) i fue reushida.
Me akodri de una konseja en este sujeto.
Ben Gourion en 1947; para fondar el pais de İsrael; establiso un partido kon su ekipa ke le ayudaron.
Los myembros de este partido eran todos ombres i solamente Golda Meir; la mujer unika.
Kuando los inglezes se apirsivyeron, serraron el partido, i echaron en prezo a todos los ombres. Komo Golda era mujer la desharon libera.
Uno de los myembros disho al amigo: “A mozotros mos aprezaron, ma eyos no saven; ke la mas valutosa, la mas kapache de entre mozotros esta afuera”.
Esto mos amostra ke; munchas mujeres komo Golda Meir estan adelantre de los ombres en los echos emportantes de los governos. Eya fue una de las fondatrises d’el pais.
A las mujeres les plaze ke sus keridos en el doredor; se akodren de sus dias espesyales; komo dia de nasimyento, dia de kazamyento; (avizo a los ombres!...) i esto amostra ke son muy sentimantales.
El ombre i la mujer es “dos puerpos i una alma”; son iguales.
Las mujeres toman munchas responsabilitas debasho sus alas kerensyozas.
Eyas son las kolonas emportantes de sus famiyas, i nunka ke no se derroken.
