Dora NİYEGOPurim es la fiesta ke mensiona la mirakuloza viktorya de los djudyos derrotando los planos danjerozos de Haman. Esta fiesta alegre revela la Mano del Dio reglando en sekreto las problemas de los djudyos. La mano del Dio esta allado de mozotros sin azerse apersivir.
Coya DELEVİ
Es un sujeto importante i bastante ancho. Visto muestro lugar limitado, me vo kontentar de azer un kurto “ekspoze.” Amanyana, 8 de Marso, es el “Diya Universal de los Derechos de la Mujer.” Kuantas reusheron a obtenerlos?...No kero ser konsiderada komo pesimista, ma, devo dezir ke no puedemos pretender un grande amijoreamyento en este domeno. Los rezultados de las las enkuestas estan amostrando ke kaji nada no troko en syertos paises, o komunidades. (o puede ser troko muy poko)
Kualos son estos derechos? En prinsipyo, son los ke asiguran a la Mujer, igualidad kon el Ombre, en el domeno sosyal, ekonomiko, politik i afilu en la vida komun. Los derechos fundamental de las mujeres son achetados por organizasyones internasyonalas, komo U.N (Nasyones Unidas), I.L.O (Organizasyon Internasyonal del Lavoro)ets...Estos derechos estan debasho la proteksyon de dokumentos(belgeler) komo la “Deklarasyon Universal de Derechos del Ombre” (İnsan Haklari Evrensel Bildirgesi), i otros...
El prinsipyo de igualidad fue syempre en el orden del diya, en las Demokrasiyas del Oksidente. Portanto, en estos paises, las mujeres dyeron una grande lucha para pueder obtener el derecho de elijir (oy kullanmak). El mas importante dokumento rezultando de esta lucha, fue el “Akordo sovre los Derechos Politikos de la Mujer”, achetado en la U.N, i ke entro en vigor (yürürlüğe girmek)en el 7 de Julio 1954.En Turkiya, ya se aviya konosido a las mujeres, desde el 1934, el derecho de votar i ser elijidas. En las eleksyones del 1935, eyas uzaron este derecho. Ma, en diversas periodas, un chiko shifro de mujeres reusho a entrar al Parlamento. Puedemos dezir, la Mujer no se entegro kompletamente (por oras)a la Politika.
Munchas organizasyones komo “El Movimyento de la Libertad de la Mujer”, i otras, lucharon para obtener los mizmos derechos sosyal, igual a los del Ombre. Entre estos, libertad de instruksyon, i eskojer su karyera, su modo de bivir, derecho de lavorar ets..En syertos derredores estas organizasyones de Mujer, provokaron reaksyones negativas, de sorte ke el movimyento kamino muy avagar. Finalmente, el U.N deklaro el anyo 1975, komo “Anyo Universal de la Mujer.”
Teorikamente, la igualidad parese egzistir, ma, en syertas komunidades, o paises, presyones tradisyonalas i relijyozas, son obstakolos delantre los derechos de las mujeres. Eyas no tyenen del todo libertad, o una relativa...Naturalmente las mujeres kumplieron una grande “evolusyon” (evrim). Las estamos vyendo (mizmo si son por la ora en minoridad), en la administrasyon, ekonomiya, politika, en la “Media.” Despues de azer estudyos superyor, en la medikerya, derecho (hukuk)ets...Mos aze grande plazer de ver este tablo pozitivo...
LA VİDA ES UNA LUCHA
(A todas las mujeres)
Todas tenemos unos suenyos,
İ, tambyen muestros dezeos,
Amores komo esperansas...
Unos se realizan, i otros,
Se pyedren en las distansyas,
Deshandomos solo ansyas...
Sin azer dinguna distinksyon,
Sin dinguna interrogasyon,
İ, sin pensar a la deziluzyon,
Mos atamos, de alma i korason,
İ, vezes kon grande pasyon...
Savelo! bivir es pyedrer o ganar,
No penses por un si, por un no,
A fuyir, i aki todo abandonar.
Porke en este espinozo kamino,
Deves syempre luchar i luchar...
