Coya DELEVİ
En el 14 de Febrero se selebro la fyesta de los enamorados. Kada uno lo izo asigun el dezeo de su korason. Esto me dyo la idea de analizar un poko los sentimyentos en muestra epoka. El benadam no es solo un fenomeno de karne i guesos. Tyene meoyo, kijo dezir, poseda fakultad de pensar, de djuzgar, de dechidar. Tyene tambyen, korason, dunke, sentimyentos...
Ma, estamos vyendo ke aktualmente, los sentimyentos estan, si no abandonados, por lo menos eskondidos, kamuflados. Alegrarse, atristarse, kerer, yorar o reir, eskarinyar ets...kedaron en sigundo plano. Estan guadrados debasho de un septisismo, o una falsa indiferensya. Afilu, la manera de pensar, la filozifiya estan trokando de djenero. Naturalmente, son sensasyones abstraktas, par konsekuensa difisil de eksplikar, de transformarlas en byervos.
Por siguro ke estamos onorando la teknolojiya del 21. Siglo. Portanto, ay unas, dos kestyones ke se demanda la persona:” Porke se deve sakrifikar los sentimyentos para alkansar a la teknolojiya? O, no se puede bivir los dos endjuntos?” Efektivamente, se esta vyendo las maneras diversas de pensar, afilu en los livros,( o en syertos ) en la mayoriya de los filmos ke se esta projetando. Se esta remarkando un aleshamyento de los sentimyentos, i en vezes, malorozamente, de las valores moral.
Sin egzajerar, puedo afirmar ke las relasyones sentimental, eyas mizmo trokaron. El materyalismo esta tomando munchas vezes el lugar del romantismo. En el mundo del 21. Siglo, ande se pyedro la uzansa afilu de eskrivir letras, la posta elektronika,(e-mail) los mesajes por G.S.M, estan triunfando. Las letras en jeneral, ma espesyalmente las de amor, no eran, o no son, solamente un medyo de komunikasyon, ma, tambyen, eshantiyones de literatura. Komo los filmos preto i blanko, i las letras manuskritas eran mesajes de amor, amistad, en kurto, de sentimyentos. Egzaktamente komo lo disho J.J.Rousseau:”La korrespondensya de los amigos, redobla sus egzistensyas...”
Me parese ke en un artikolo miyo tengo eskrito ke el amor se transformo en un materyal de trato: kazamyentos kon kontratos!!!Los amores lejendaryos ke uzavamos a ver en muestra manseves, en los filmos, al pareser kedaron en el pasado. Por siguro ke oy en diya ay munchos ke toman plazer del romantismo, esto no se puede enyegar. Ay de pensar ke el estado aktual, es komo una ola de “moda”, un “trend” ke va trokar kon tympo. Ay una realidad: el materyalismo no es sininimo de felisidad...
Aun kon todo, es ke los sentimyentos, estan konservando sus aktualidad, sus ermozura, en muestra epoka? Un profesyonal respondyo ansi :”En partida, en una manera limitada, si. En las komunidades avansadas en teknolojiya, la nosyon de famiya esta komo pyedrendo su importansa de diya, en diya. Sentimantalmente, las personas estan arrondjadas a la soledad. Aki se puede avlar i de los aedados. Ma, no devemos olvidar ke e benadam nesesita kerensya, amistad, kudyo, mizmo si no se konose el amor. A lo menos, mos kereremos i respektaremos de parte, a parte...”
La opinyon del espesyalisto no esta dando muncho koraje. Se esta aserkando afilu, del pesimismo. Los sentimyentos son umanos,fueron syempre una parte inseparavle del benadam. Es por esta razon ke yo penso, eyos no deven despareser. Kero kreer ke estan eskondidos, o enyegados en partida, i,...por la ora. Ya es verdad ke, en una mezura estamos bivyendo una epoka teknolojika, ke el materyalismo tomo el lugar del romantismo. En vezes penso ansi, ma no syempre!...Esto sigura ke, i oy en diya, los sentimyentos tyenen sus lugar eskojido. Esto, lo vimos serkamente, en las selebrasyones de la “St. Valentine”, el diya ke konosemos aki,komo “Sevgililer Günü”...
