El enterlokutor mos disho ke el porsentaje de reushita en las kreaturas ke sufren de kanser, es setenta u setentisinko por sien. Por esta razon, los doktores estan aziendo sus puederes para salvar estas kreaturas. La administrasyon del opital no esta demando ni un shekel de los Palestinianos, kuando salen del opital. Imajinovos ke karar de karo es el tratamiento de kanser en un opital komo Hadassah! Los doktores Israelianos estan dizyendo ke, es sus dover de humanidad de salvar estas kreaturas.
Los doktores i los enfirmieros Palestinianos estan lavorando endjuntos kon los Israelianos, i estan partisipando a los kursos i a las konferansias. Un doktor Palestiniano esta dizyendo ke, Hadassah es el mijor lugar de ambezarse los asiertos de salvar vidas, porke aki estan topando la posibilidad de lavorar kon los mijores chirurjianos. El enterlokutor mos amostro una fotografia de estos doktores, suivando una konferensia. En travando esta fotografia, una doktora Palestiniana se serro la kara kuando se apersivio ke la estan fotografeyando.
Kuando el vyejo Primero Ministro Ariel Sharon paso el primer golpe de paralisia, un enfirmiero Ahmed estuvo al lado de el, i se okupo de el noche i diya en el opital Hadassah. Vos puedesh imajinar un Palestiniano okupandose de Sharon, en un lugar anturado de tanta sekuridad porke dingun Palestiniano no pueda entrar!
Los hazinos i sus famiyas estan remersiando miles de vezes los administratores de Hadassah i kuando les demandan si estan kontando en sus payis el komporto i la amistad ke ven en Hadassah, eyos estan respondiendo ke no lo pueden dizir del espanto de ser matados.
El enterlokutor mos konto ke konosio una Palestiniana ke torno al opital de Bersheva komo una bombiera del suisido kon la entansion de matar a los doktores i hazinos Israelianos, duspues de un sierto tiempo ke fue kurada en el opital Bersheva.
A lo ke mos konto el enterlokutor, malgrado ke el governo Italiano esta pronto a akseptar hazinos Palestinianos a sus opitales, fista oy solo un grupo de Palestinianos aksepto esta envitasyon. Munchos de los Palestinianos estan preferando de kurarsen en Hadassah.
Los doktores de Hadassah estan aziendo lavoros kolektivos kon los opitales de munchos diferentes payises. En la Turkiya, estan lavorando kon el opital Memorial en Estambol, i kon un otro opital en Ankara.
ERRATUM
En el artikolo intitulado “El 19 del Marso, el diya de la komemorasyon de los 50.000 djudyos salvados de las manos de los Nazis” ke fue publikado en el Şalom del 14 Marso, el payis de nasimyente de Moshe Dayan fue notado por yerro Bulgaria, en lugar de Israel. Mos ekskuzamos.
