En 1866 los djudyos de Austria ke aviyan vinido a bivir a Turkiya, fondaron una sinagoga de tavla ande se topa oy la sinagoga de Yüksekkaldırım.
De esto se esta entendyendo ke; antes ke se konstruise esta batisa aviya otro kal.
Para fondar aki; los djudyos de la Austria ayudaron muncho materyalamente. El ke ayudo mas muncho era Herman Goldenberg; un djudyo de Austria i lo realizo a la memorya del rey I. Franz Joseph ke kedo 50 anyos en el pueder i dirijo su pais.
El arkitekto de la sinagoga se yamava Cornaro; el era de Venezya de İtalya.
Carlmann realizo a la memorya de su mujer, el Ehal Akodesh kon la Teva; kon una broderiya de mano ke no se puede realizar oy en diya.
La sinagoga de la komunita Ashkenaz ke se topa en Galata se avyo en 23.09.1900.
En este diya, se toparon; el grande Rabino de akel tyempo ke era Rav.Moshe Halevi, i munchas otras personas emportantes.
El kantor Vladovski kon la boz de seda meldo las orasyones. İ a la fin el ambasador de Austria avlo senseramente i alavo a los Ashkenazes por la solidaridad, unyon i armoniya ke tuvyeron en el akomplisimyento de esta sinagoga.
Viniremos a Rivka kon Percy. La sinagoga estava yena de djente; personas de todas las umas.
El kal ornado de rozas, la istorya ke se estava vyendo en el doredor d’el kal, i todos emosyonados kon razon.
Lo ke estava dando en ojo a la entrada, era ke aviya el violonisto Bora Güler a la syedra de la Teva, i a parte la muzika Klezmer muy diferente. La armoniya d’el violon kon la muzika Klezmer estava ekstraordinaryo.
En primero entraron Meri kon Robert SCHİLD i Percy estava en medyo de la madre i el padre.
En los sefarades es la madre ke se topa en medyo.
Enfin, suvyeron a la Hupa, el Rav. İzak Alalu izo sinyar la ketuba; i entremyentes la novya luzya i dulse Rivka suvyo ariva kon la madre i su famiya.
En los Ashkenazes ay un uzo; ke la novya antes de entrar al kal; suve ariva i en una siya ornada de rozas, allado de eya su famiya; vyene el novyo a alevantar el velo por mirar i kontrolar si ez eya veramente.
Ya savemos ke tenemos en la istorya Rahel por Situla.
Yaakov Avinu; le dyo a Lavan a Lea despues ke lavoro syete anyos; i fue ovligado de lavorar otros syete anyos por ayegar a Rahel. Esto paso a la tradisyon djudia; i por esto es ke el novyo vyene a kontrolar a la novya.
Kuando lo yamaron al novyo para ke konfirme a la novya; el se alevanto kon la madre i el padre, vinyeron endjuntos fina la puerta, el suvyo ariva, i kuando abasho; el en medyo i la madre kon el padre kon unas kandelikas en la mano suvyeron a la Hupa de muevo.
Estas kandelas son el simbolo de la luz, de la klaredad. Mos puedemos pensar de esta manera; ke el kamino, la vida de los muevos kazados seya yena de luz i klaredad.
En esto entro la novya i kuando vino debasho la Hupa; el novyo en pyes en medyo, los paryentes asentados debasho la Hupa, la novya se abolto syete vezes en el doredor d’el novyo.
Esto es el simbolo; d’el mundo ke se konkriyo en syete diyas.
Despues; Percy metyo el aniyo al dedo de Rivka.
La shehina d’el Dyo estava akompanyando a los mansevos.
Rav. Mendi meldo las Sheva Berahot i dyo un diskorso en ingles i en turko; enriva la kerensya de la famiya, i de la unyon; i bendizio el vino ke es el simbolo de la alegriya i la abondansa.
Los kazados bevyeron este vino i el novyo rompyo el vazo.
Este evenemyento mos akodra; ke la persona no kale ke se olvide de las dolores, amarguras mizmo en el diya el mas orozo de su vida.
La seremoniya se termino kon muncha alegriya i felisidad. Todos oguraron una vida yena de amor a los novyos.
El emportante es ke seyan orozos fin a la fin, i ke bivan kon pas i amor todo sus vidas.
