“Los ijos de Israel, kedaron 430 anyos en Misraim. En el diya final de estos 430 anyos, todas las Armadas de D. salyeron de la tyerra de Misraim.”
“Esta noche (de Pesah)es la noche de guardiya para D. al salir de Bnei-Israel, de las tyerras de Misraim. Es la Noche de D., i todos los ijos de Israel seyan guardiyanos de jenerasyon, en jenerasyon..”(Shemot- Kap.12-V.41ᆾ)
Coya DELEVİ
“...a layla a ze, mi kol a leilot?” Kuanto fue demudada (estranya) la noche la esta, mas ke todas las noches?...La repuesta la meldamos en kada SEDER, en la Hagada de Pesah, fyesta de los prodigos de D.en favor del puevlo Djudio. Pensi de transmeter propozitos de autoridades relijyozas, sovre Pesah i el mez de Nissan. Aki, unas kuantas linyas sinyadas del Grand Rabbino Moshe M. Levy, en la revista “Los Muestros”, antes unos, kuantos anyos:
“Los doktores de la Ley komentan ke noche de Pesah, D., en toda su mizerikordiya, velava porke el “Satan”destruidor no se interpoze, i no se permeta de impedir los ijos de Israel, de liberarsen del esklavaje de Ejipto, ande eyos eran detenidos komo prenda por Paro, ke no konosyo los grandes servisyos rendidos por Yosef Hatzadik a Misraim...La fiesta de Pesah es l’akomplisamyento de la promesa i asistensya Divina ke mos konservo i sostuvo muestros padres en los momentos trajikos...”(fin de sitasyon)
No selebrar el “Seder” es mekonoser la valor permanante de los prinsipyos de la “TORA.” Son estos prinsipyos ke mos azen preguntar: “Ma Nishtana?” La libertad ke Bnei-Israel gano, salvandose del esklavaje, le izo achetar tambyen, un “YUGO” (boyunduruk), una sumisyon a syertas ovligasyones. Por mas mijor entender, kero prezentar aki, los propozitos de Rabbi Wein (Jerusalem Post 2006) en su rubrika “The Voice of Jewish History”, ke tresladi:
“...El mez de Adar es prezentado al puevlo Djudio, komo “Marbin Besimha” (pujar la alegriya). Esto es kompreensivle, syendo ke en este mez, selebramos las festividades de PURIM, muestra delivrensa de la total destruksyon ke planeava el maldicho Aman...Si delivrensa de una eksterminasyon nasyonal es razon de alegriya, de festividad, alora, i el mez de Nissan deve ser para el puevlo “Marbin Besimha”. Nissan, kon la grande fyesta de Pesah, es sin dubyo, la mas komemorativa peryoda del kalendaryo Ebreo. Ma, en la deskripsyon de las fyestas de la anyada djudia, en muestras orasyones, Pesah es referado komo ”Zman Sheirateynu”. Kere dezir: el momento de muestra delivrensa i de libertad.” (fin de sitasyon)
Deke ansi?...Ay una diferensya esensyal en el grado de alegriya, entre las fyestas Purim i Pesah. Tambyen, las dos fyestas son de djeneros diferentes. En Purim, ay una egzaltasyon, en komemorando la desfecha de Aman. Lo ke permete una alegriya kaji inkontrolavle, bayles, karnavales i kostumes...Sintiremos de muevo al Rabbi Wein:
“...La delivrensa a la libertad en la vida djudia, komporta ovligasyones, implika responsabilidades, vizyon i sakrifisyo. En Pesah, no mos deshamos a la alegriya egzuberante de Purim. En Pesah, ay el reselo del “hamets”, las restriksyones de “Yom Tov.”Realizamos ke la verdadera libertad demanda una grande dishiplina, un sensyo de entendimyento. I, esto marka la alegriya de Nissan i de Pesah. Una alegriya ke no es espontanea, ma, ke egzija preparasyon i pensamyento...” (fin de sitasyon) Keridos lektores, son estos pensamyentos ke mos ovligan a pozarmos syertas preguntas. I, en una mezura, mos azen revenir al kamino de ande mos aleshimos, (si mos aleshimos) i azer teshuva.
En el kalendaryo Ebraiko, Adar i Nissan, Purim i Pesah, estan uno detras de otro. La alegriya kalma en la selebrasyon de Pesah, es komo dezir, la kompensasyon de la alegriya sin mezura de Purim. Pesah es el verdadero konsepto de la alegriya djudia, la deskripsyon kontinual de muestra libertad. En este espirito, arresiveremos el mez de Nissan, kon la Primavera i la fyesta de Pesah. Otruna vez vamos a demandar: “Ma Nishtana?”, i en la mezura del posivle, vamos a dar eksplikasyones a muestros chikos...
HAG SAMEAH-MOADIM LESIMHA.
