Klara PERAHYA
Si, grasyas a la maraviyoza inisyativa i al dinamizmo de Karen Gerson Şarhon (Sentro Kultural Sefardi) i Pablo Martin Asuero (Inst. Cervantes), lo ke paresia ser una utopia devino una realidad. Un kongreso sovre “la Prensa Sefardi en Judeo Espanyol”, de Israel, la Turkia i los Balkanes, tendra lugar en Estambol del 27 asta el 30 Avril 2007.
Esta Konferensya organizada por “el İnstituto Cervantes”, “el Sentro de Investigasyon sovre la Kultura Sefardi Otomana-Turka” i “el Semanaryo Şalom”( kon la alta bendisyon de Rav Isak Haleva Gran Rabino de Turkia i la kontribusyon de Silvyo Ovadya Prezidente de la Komunidad Judia de Estambol) pudo ser realizada grasyas al patronaje de:
Fortüne Isak Pinhas (Fundasyon de Edukasyon, Kultura i Ayudo Sosyal)
La “Bilgi Universitesi”
La “Beykent Universitesi”.
La Sinyora Ana Salomon, direktora de la “Casa Sefarad Israel” de Madrid i tambyen grandes Universitaryos de Espanya, Israel i Almanya ansi ke Shefe-redaktores de periodikos sefardis van a partisipar:
Elena Romero (CSİC) Espanya
Tamar Alexander (Universidad Ben Gurion) Israel
Paloma Diaz Mas (CSIC) Espanya
Amelia Barquin (Universidad de Mondragon)
Ramon Magdalena (Universidad de Barcelona) Espanya
Matilde Morcillo (Universidad Castilla la Mancha) Espanya
Christine H. Lochow Drüke (Universidad de Frankfurt) Almanya
Eliezer Papo (Universidad Ben Gurion) Israel
Moshe Shaul -Fundador i kapo redaktor de la Revista Aki Yeroushalayim
Tilda Levi – Shefe koordinadora de Publikasyon del semanaryo ŞALOM
Naim Güleryüz, ko-fundador i ”kurator” del Muzeo Judyo de Estambol
Moshe Grosman, prinsipal kolavorador del defundo Avram Leon, fundador del Salom En 1955
Sami Koen shefe de la Seksyon Politika Estranjera del kotidyano Milliyet i ijo de Albert Koen, redaktor del vyejo periodiko “La boz de Turkia.
Zelda Ovadya (Aki Yerushalayim) sovre el arte kulinaryo
De mezmo van a tomar la palavra:
Karen Gerson Şarhon Fundadora de la revista “El Amaneser”, Beki Bardavid sovre la poezia de su madre “la poetesa Rina Kohen Albukrek”, Pablo Martin Asuero, Esther Bendahan, Mercedes Monmany, Fernanda Santiago i Jose Antonio Gomez Municio, Jorge Eduardo Benavides, Rosa Moro (İnst.Cerv. Tel-Aviv), Pedro Badenas (İnst. Cerv. Athena), Louisa Fernanda Garrido (İnst. Cerv. Sofia).
Konsyerto de Flory Jagoda.
Ekspozisyon de Dinah Salama.
El tema prinsipal de este Kongreso es bastante sinyifikativo. “La Prensa” kon la varyedad i la aktualidad de las kestyones tratadas, es un medyo de komunikasyon i de interkambyo de ideas muy dinamiko, lo ke fasilita la propagasyon i el mantenimyento de un idyoma i de una kultura..
Una lingua no es solo un asemblaje de palavras, eya yeva en sus entranyas la sensivilidad komo la sagasidad de un puevlo i tambyen la memorya de sus tradisyones i kreensas.
Es por esta razon ke, en desparte de su grande valor kultural, este simpozyum tyene una sinyifikasyon muy profonda. Su realizasyon en muestra sivdad ande, 50 anyos antes, syertas personas refuzavan de avlar la lingua de los avuelos es komo una viktorya de la enerjia kontra la apatia, de la esperansa kontra el septisizmo i del rekuerdo kontra el olvido.
