Keridos Korelijionarios,
Ayegando i este anyo a los diyas de “Pesah”, fiestamos una otra ves el kumpleanyo de la salvasyon de nuestros antepasados del kativeryo en Ayifto i de alkansarmos a la libertad. Agradesemos a el Santo i Bendicho El por ke mos ayego a aunarmos en ambiente del “Seder de Pesah” i fiestar kon yena prosperidad i alegria.
Ya lo savemos bien ke siendo “Hag Haaviv”, el “Pesah” mos apregona la primavera donde la natura se arefreska i se renovela, i siendo “Zeman Herutenu” aksentua nuestra libertad ke anima nuestra espiritualidad por siempre.
De otra parte, es una realidad ke “Pesah”, komo el sentro de la fey Djudia es bien savido ke es tambien el prensipyo de nuestro establesimiento relidjiozo i sosial.
Siendo ke paso mas ke trenta i kuatro siglos de este evenemento, el pueder konservarmos nuestra egzistesia relijioza i sosiala malgrado todas la kondisiones enkonvenientes de la istorya, aprova la fortaleza i la rezistensia del dicho establesimiento ke traverso los siglos.
Keridos Ermanos,
Este apoyo istoriko nos da la responsabilidad de protejarlo verso el avenir i sigun mi esto se puede azer en transmetyendo nuestra kultura relidjioza i soysala a las jenerasiones nuevas i el “Seder de Pesah” es la oportunidad la mas adekuada por esto.
El “Seder de Pesah” mos da la okazion de edukar a nuestros korelijionarios de toda edad i sovre todo a nuestros ijos de edad de adolosensia ke estan aviertos a todo modo de enfluensa todo en siendo sin ninguna defensa kontra esto. Kon la “Agada” ke resitamos todos endjuntos se deve enkulkar el fakto de “Pesah” a estas jenerasiones mezmo en profitando de unas kurtas eksplikasiones por darles a entender.
Es kon esto ke puedemos afirmar el presepto de la Tora ke mos dize “Veigadta Lebinha Bayon Hau / İ Les Kontaras a Tus İjos el diya mizmo..” i el prinsipio del Talmud ke mos enkomenda: “.. Ella Beşaa Şematsa Umaror Munahin Lefaneha / Kuando la Matsa i la Lichua estan Pozadas Delantre de Ti..”
Esto bien siguro ke no mankarash de profita de esta okazion.
Es muy emportante de estimular a nuestros ijos a ke partisipen a las sinagogas en praktikando las orasiones. Los livros de orasion ke formimos en la lingua diaria fasilita a tomar el visyo de la orasion a nuestros korelijionarios de toda edad i sovre todo a los mansevos.
Grasias a los esforsos de nuestros ermanos bien edukados, oy alkansimos a una multitud de livros en la lingua diaria, ke mos da a mano de entrodusirmos a nuestra kultura relijioza i sosiala. Penso ke estos livros se tienen de obtener i estudiar por todos nuestros korelijionarios i sovre todo por los mansevos. Kreyo ke de estos livros se puede profitar komo regalos bien provechozos para la nuevas jenersiones.
Me kontento de saver ke estamos de mizma opinion.
Vos kero dizir kon muncha kontetntes tambien ke tenemos el orgulyo ke nuestra eskola tiene lugar en los primeros rangos entre su ekivalantes, esta eskola eleva i eduka a nuestros ijos en armandolos seya kon nuestra kultura i seya kon siensas kontanporaneas i los restruktura komo endividuos kompetitivos.
Keridos Korrelijionarios.
El kerer de yamar vuestra atansion a la edukasion de nuestros ijos i ijas en este masaje de “Pesah” proviene ke el “Pesah” teine tambien por buto la edukasion de nuestros ijos.
Esto bien konvensido ke el azer inversiones a nuestra juventud tambien es un modo de inversion a nuestro futuro. Grasias a esto puedemos tener la razon de fiestar el “Pesah” en todas las jenerasiones.
Todo en estando yeno de estos pensamientos i sentimientos vos felisito kon toda mi senseridad en prezentandovos las bendisisones de nuestra Santa Tora, i mis dezeoz de ayegar a munchas fiestas djuntos kon vuestros serkanos i keridos en pas i ermandad.
Hag Pesah Sameah
Rav İsak HALEVA
Gran Rabino
