Eske el ekseso de progreso tekniko sera un faktor de destruisyon para la sivilizasyon?

Klara PERAHYA
La semana pasada los syentifikos del “GIEC”* (Grupo Intergovernomental sovre la Evolusyon del Clima/klima) endjunto kon delegados politikos de los payizes fuertemente industrializados, se rekojeron en Bruxelles para diskutir sovre la degradasyon progresiva de la tyerra i de la atmosfera mundyal a la sigida de las emanasyones de varyos gazes danyozos para las kondisyones de egzistensya de muestra planeta.
El raporto de 1400 pajinas ke eyos publikaron vyernes el 6/4/2007 (despues de largos kambyos de ideas i fuertes diskusyones) es mas ke pesimisto, kaji dramatiko. El arrekayentamyento de la atmosfera provokado en grande parte por una industrializasyon eksesiva i munchas vezes sin kontrol, puedra tener konsekuensas trajikas sovre lo ke sera en el futuro la vida de muestros inyetos i bizinyetos..
El mundo se topa delantre un terrivle paradokso ...Aunke portadora de immensas rikezas materyales, la loka frenezia del desvelopamyento tekniko riska de destruir el ombre en su egzistensya komo en sus raportos inter-umanos.
“Si en el espasyo de los 10 anyos venideros, syertos parametros de la aktividad kotidyana del ombre moderno no trokan de una manera absoluta”, “si el no modifika sus objetivos  kaji unikamente konsentrados sovre la obtensyon de mas i mas opulensya”, “si el no toma prekosyones drastikas para ekilibrar su ekspansyon industrial” graves, muy graves problemas surjiran para la posteridad.
En un futuro no muy leshano:
3 milyardas de personas van a sufriir de mankura de agua.
600 milyones de ombres, mujeres i ninyos, malorozamente los mas proves i los mas desmamparados, seran amenazados de ambrera.
De 20 a 30 por syen de las espesyas vejetales i animales puedran despareser, lo ke sin ningun dubdyo dezekilibrara de una manera trajika el ekosistema natural
Los savyos mos dan la vizyon de un mundo sovrepuevlado, kon un nivel de kayentor kada vez mas alto, en una atmosfera kada vez mas embutida de gazes danyozos difisil a respirar.
Grandes sakrifisyos devran ser konsentidos de la parte de los payizes los mas evoluados i de los ombres los mas poderozos . No se trata de retornar al modo de bivir de los siglos pasados, kada epoka tyene el suyo, ma simplemente de metrizar el progreso de la teknika.”
Delantre la amenaza de una destruisyon del patrimonyo fiziko de la tyerra, el egoizmo i la voluntad de los grandes estados devran abdikar en favor de los imperativos egzistensyales.
Eske eyos i tambyen los syentifikos en la ardor de sus orgolyo, i de otra parte eske los dirijentes de payizes en estado de desvelopamyente van akseptar de ralentisar sus enkaminamyento?
Es ke la umanidad esta pronta a renunsyar a lo ke asta agora fue su eskopo primordyal: “mas konfor”, “mas lukso”, “mas fasilidades”? Es ke el ombre de mas a mas ambisyozo i ambyerto de poder va enfin entender ke ay i otras valores a defender en la vida?
Las solusyones ke eyos eskojeran seran un testigo del nivel de maturidad de muestra sivilizasyon.