Dora NİYEGOLa kuzina (el mupak) fue el lugar ke muestras madres pasavan la mas grande parte de sus vidas.Antes, en las komunidades sefaradis, la kuzina era el magazen de la mujer. Es aya ke eya puediya amostrar sus talentos para pueder ganar el estimo i el amor de su marido.
Esta es una estorya verdadera, una estorya de kerensya, de kompasyon, de sakrifisyo i de onor, ke se desvelopo en el korso de mas de 60 anyos. Un teksto redijido en Inglez, ke meldi en un soplo malgrado su largor. Eziti de tresladarlo, djustamente achakes de esta largor. Dechidi a la fin, akurtarlo un poko en adaptandolo myentres la traduksyon, i publikarlo en tres vezes. Espero ke el lektor va meldarla kon un plazer i emosyon...
Adaptasyon-Traduksyon: Coya DELEVİ
1943...Avraam Shapiro (1*) un mansevo de 22 anyos, ansyano elevo de la Yeshiva de Krakova... Rendyendose kuento del buto de los Alemanas de eliminar kompletamente todo Djudio, ampeso a azer planos de salvasyon, por el i sus djenitores. Reusho a obtener papeles falsos de identifikasyon, komo syendo sujetos de otro estado. Pensava fuyir a la Ungariya, apenas ke los Alemanas ivan entrar al Getto de Krakova. Aparejo un “bunker” en un mahzan (bodrum), en el fondo leshano del Getto, izo stok de komanya...
11 Marso 1943...Haya Rivka, una muchacha de 18 anyos, vezina de Avraam, resivyo una notisya avizandola ke iva ser embiyada a un kampo de lavoro. Su ermana i el marido, ya ivan sidos deportados a Treblinka. El chiko Hayim, sus ijo de 20 mezes, fue un nes, ke kedo kon Haya, su tant. Dunke, eya, akel diya, kon el bebe en los brasos, sono a la puerta de los Shapiro. Asigun Haya, Avraam posedava shanses de salvar, mas ke los otros moraderos del Getto.Lo supliko de tomar i protejar el bebe, porke no teniya dingun lugar ande desharlo.
Avraam tan organizado, tan prekosyonozo i preparado a eskabuyirse (kurtulmak) de los Nazistos, no pudo trespasar i eskabuirse de su buen karakter, komo lo disho mas despues: “Mi kompasyon endormesyo mi pensamyento, mi lojika, i dechidi de achetar la kriatura.” Vyendo al chiko kon Avraam, sus djenitores se ensanyaron (öfkelenmek) muncho. Porke, eyos ya aviyan refuzado kategorikamente Haya, kuando mas antes, eya les aviya echo i a eyos tambyen, esta demanda de proteksyon. Un bebe, para eyos, era un obstakolo ke iva amenguar sus shanses de salvasyon...Komo Avraam pudiya ser tan illojiko, i meter sus vidas en perikolo?..El mansevo respondyo, ke entonses, el bebe era su kriatura. O ivan a salvar todos de este inferno, o ivan a ser enkarselados en el fondo del Getto todos los kuatro.
Avraam, sin pyedrer tyempo, se prokuro un daktilografo. El, ke de su vida, nunka teniya pizado a una tush de estas makinas, noche entera lavoro. Reusho a produizir un sertifikato de nasimyento para el chiko. El dokumento paresiya bastante otantik i kreivle. Lo yevo ande el Rav, ke apozo la estampa ofisyal!... Anyos despues, Avraam relato ansi este epizodyo: “A Avraam Shapiro le aviya nasido un ijo!...”
Dos diyas despues, los Almanes likidaron el getto de Krakova. Arrekojyeron los Djudios en una plasa, divizandolos en diferentes grupos para la deportasyon. Los mansevos al lavoro, los aedaos para los azilos de vyejos, i los chikos, para mestras o eskolas!...Avraam ya saviya ke esto era una infama komediya, una grande mentira. I, kuando uno kijo tomarle el chiko Hayim, Avraam, gritando “todos endjuntos!”, refuzo de darselos...
Akel diya fue imposivle de irsen al “bunker” ke Avraam aviya aparejadao, syendo ke este lugar era en la otra parte de ande se topavan. El mansevo, deshando al chiko kon la Sra. Shapiro, i enkomendando de no meneyarsen de ayi, fue bushkar un abrigo temporaryo. A la fin de una larga i dezesperada bushkida, topo una fragua dezyerta, kon eskaleras indo a un mahzan. Malgrado el grande perikolo, reusho a tansferar ayi, su famiya. Naturalmente, teniya reselos, savyendo ke presto o tadre, los Alemanes ivan a bushkar todo kanton del Getto. Ma, la Providensya Divina les asiguro una proteksyon inkreivle...
(a kontinuar)
(1*)_”Shapiro” es un pseudonimo. El protagonisto prefera kedar anonim.
