Entremyentes Pesah es el simbolo de la primavera. Los tyempos mos estan akodrando esta sezon porke estamos vyendo en los arvoles las rozikas blankas, i en las islas las rozas karakteristikas las mimozas ke mos achileyan los korasones.
Blankas, rozes, lilas, amariyas las kolores alegres de esta sezon ke vino temprano este anyo. En Pesah se embiya el ayre kon las luvyas i se aze una orasyon para ke el rosio (Morit Atal) venga i seya el simbolo de este mez de Nisan.
Pesah para mi es una fyesta alegre, porke la famiya entera; madres, padres, nonas, nonos, ermanos, ermanas, inyetos, inyetas, tiyos, tiyas todos se arekojen en el doredor de una meza para azer el “Seder de Pesah” ke moz da la okazyon de edukar los ijos, ijas de todo modo de edad. Veluntad buena ke tengan!... En muestra kaza se melda; en ebreo, en espanyol i se da a entender a los chikos en turko; para enkulkarles la emportansa de esta fyesta.
Kale dar unas kuantas eksplikasyones a los mansevos para ke puedan kontinuar estas tradisyones en sus kazas kon sus famiyas. Pesah ke es una fyesta alegre es i mizmo una fyesta muy kanseryoza.
Las mujeres de kaza ke son el kapo de la famiya en el mupak; kale ke se aparejen de antes kinze diyas.
Las espinakas lavadas de una parte para azer rulikos kon karne, i fritadas de la otra. Las prasas para azer albondigas de prasa, los guevos; kozerlos tres oras para ke se agan rufyos rufyos; burmuelos, el peshkado a la chaka; las encinaras, el kodrero kon patatas freskas al orno, las dolmas de tomates kon pipiruschkas, los rulikos de berencena, el masapan, el gato de muez kon el tezpishti; todo esto para ornar la meza de esta fyesta.
Enfin ya paso kon muncha felisidad i alegriya i el Dyo ke mos ayege para kada anyo kon todos endjuntos, i pujados i non aminguados...
Pesah es una fyesta una de las mas emportantes ke se selebro mizmo, en la revolta de los djudyos d’el geto de Varşova. El eroe (kahraman) Mordehay Aliyevich d’el geto de Varşova; kuando el apreto el primer plomo (kurşun) a los Nazis; los aedados ke no puediyan gerrear, malgrado todas las difikultades; estavan meldando la AGADA de alma i de korason.
Esta semana se va komemorar el Holokost.
Kale pensar ke munchas viktimas d’el Holokost no tyenen un simeteryo.
Todos mozotros; en eskrivyendo en este sujeto u en meldando una poesia, en diskorsando, en avlando i en orasyonando, mos va mos a akodrar de eyos i en nombrando lo ke paso, los va mos a komemorar, i esto va pasar en lugar de simeteryo en muestros korasones.
Para komemorar este evenemento ke ez la kara eskura (yüzkarası) de la istorya; kale dar a entender a muestros ijos i mansevos lo ke se paso, porke munchos puevlos se estan olvidando i estan mizmo enyegando (inkar etmek) este evenemento maldicho ke fue en la sigunda gerra mondial.
Estamos kemando sej kandelas kon muestra famiya aryento de una barka blanka de vidro para akodrarmos d’el Holokost.
Para pueder protejar la umanidad; kale transferar (aktarmak) a las jenerasyones futuras lo ke puede azer una persona negra a la otra. Estamos kemando las sej kandelas aryento de una barka; porke la vida es un kamino de agua. La agua de la tripa de la madre de la persona, fina la agua ke se lava antes de enterrarse...
La kolor blanka es el simbolo de la inosensya; por esto kemamos las kandelas aryento de una barka blanka.
Las sej kandelas son el simbolo de los sej milyones de djudyos ke se muryeron.
Para no olvidarmos de estos diyas ariskuros; mozotros daremos mano kon mano, para enkulkar a los mansevos esta realitad amarga.
Nombraremos a muestros korelijyonados ke se muryeron sin tener dingun pekado, solamente por ke eran djudyos.
Va vinir tyempo ke la rasa de los ke se salvaron d’el Holokost se va terminar i los ke no bivyeron estos diyas ariskuros se van a olvidar muy presto de esta realitad.
Muestra misyon, muestro dover es de akodrarmos de eyos en kemando estas sej kandelas para pueder atestiguar (tanıklık etmek) a la istorya, i en gritando:
NO MOS VA MOS A OLVİDAR!...
