Por lo poko ke alkanso a ver, fue impresyonado de la rikeza, i de la grande biblioteka yena de Livros Santos. Konfiente, de azer lo mijor para Hayim, entrego “su ijo”. Unas, dos vezes Avraam, enkontrando el Sr. Schonbrun en la Sinagoga, resivyo repuestas yeladas a sus demandas sovre Hayim. “Por el byen de la kriatura me aleshi de la famiya ke no keriya ke el chiko konosyera su antepasado.”
En el 19 del Marso 1944, los Alemanes okuparon la Ungariya. Avraam i el padre fueron tomadas de la Sinagoga, transferados de lugar en lugar, i finalmente al furgon verso Auschwitz. Kon una chika navaja eskondida, Avraam, reusho a anchear la ventanika del furgon. Myentres ke el treno estava avansando la Slovakia, en direksyon del kampo de la Muerte, los dos ombres saltaron a la vida... i kedaron asta la fin de la gerra en este pais.
Apenas liberada por los Rusos, Avraam i su padre, tornaron a Budapest, al azil ande un anyo antes kaji, aviya kedado la Sra. Shapiro. La vyeron en la meza, komyendo “matsa”... Era el primer diya de PESAH, la fyesta de la liberasyon de los Djudios... En sus memoryas, Avraam eskrivyo: “Kuando lo enkontrava en la kaye al chiko Hayim kon su dada, sintiya lagrimas, ma nunka me aserki de la kriatura.” Syendo ke Ungariya Komunista no era entonses lugar para los Djudios relijyozos, los Schonbrun partyeron por Montreal, Canada, ande s’engrandesyo, i kazo Hayim. Avraam se fue a Israel, kazo en el 1950.
Las distansyas i los anyos no pudyeron dezatar el anyudo de kerensya atado en sus egzistensyas. Avraam, bivyendo en Haifa, syempre tuvo novelas de Hayim, i de su modo de bivir. Djugo del azardo, una tant de su mujer era amiga de la Sra. Shapiro. Ansi, Hayim, sintyo su tiyo dezirle: “En Haifa ay un sinyor ke te salvo la vida, te yevo de la Polonya asta la Ungariya...” En 1980, 35 anyos despues de la fin de la gerra, aedado de 37 anyos, Hayim i su famiya, vinyeron a Israel por la Bar-Mitzva de su ijo. Ambezandose el nombre de su salvador, s’enkontraron en Haifa.
“Todos los dos yorimos, i yorimos, avlimos oras enteras.” disho Hayim rememorandose akel enkontro, ke fue empesijo de una fuerte amistad. Eran komo padre i ijo. Entervalo de los 27 anyos sigientes, estuvyeron en bodas resiprokas, de ijos i inyetos...
A la pregunta de Hayim “Deke asperates 35 anyos?” Avraam le respondyo en dandole una kashika: “Toma, el sekreto esta aki. Asperi 35 anyos para dartela.” Hayim la avyo, enkantado de verla yena kon piesas d’oro... Su madre, antes de partir por Treblinka, aviya konfiado a su ermanika Haya, la vida, el avenir de su chiko Hayim, djuntos estos oros...
En la fuida dezesperada del 43ᇀ, la famiya Shapiro, en ovligo se aviya “emprestado” del oro de Hayim, i, arrivados a Budapest, aviya kedado poko. Avraam estava malorozo: “Salvando una vida ize una mitzva ke no kije vender por todo el oro del mundo...” Apenas ampeso a lavorar, estuvo avansando grosh, grosh, para pueder inchir la kashika komo estava en 1943. Esto le tomo 35 anyos... Ma el, kontente de no aver bushkado profito de su akto de salvasyon, dyo la kashika a Hayim, ke no la kijo achetar. Finalmente kedaron d’akordo de azerla dono a una ovra en Israel, kon el nombre de Hayim Schonbrun.
En el Getto de Krakova la kompasyon aviya endormesido la lojika de Avraam, ma no su onestedad, su onor...
Manadero: (Who Will Save the Baby?)- Sara Yoheved Rigler
