Klara PERAHYAEl kolokyo nombrado “La Jornadas de la Kultura Sefardi” ke tuvo lugar del 29 la manyana asta el 30 Avril medyo dia, en el Instituto Cervantes de Estambul, fue una reunyon kosmopolita, kompuesta de partisipantes de diferente lugares del mundo, de la Peninsula Iberika byen entendido komo de Israel, lngletyerra, Turkia i Almanya.
Şeli GAON
Keridos Lektores,
La ultima eskritura la termini en dizyendo :
“No mos va mos a olvidar NUNKA” de la Shoa. En este sujeto kero felisitar a los mansevos i mansevas de 18ᆫ anyos de los mansevos, ke reusheron a azer esta organizasyon maraviyoza por komemorar este diya ariskuro de muestra istorya.
Kada anyo eyos se aparejan de antes un anyo para topar kozas muevas i enteresantes.
No kale olvidar tambyen el apoyo d’el jurnal ŞALOM ke dyo a estos mansevos de Yıldırım en todo modo de aprontamyento i en todo modo de espasyo.
Eyos embiyaron kon el jurnal ŞALOM en una anvelop una lettra d’el alfabe a 3000 abonados; i allado de esta letra una kandela para kemarla el diya de la komemorasyon.
El prensipo de esta letra es de eskrivir un byervo en el sujeto del Holokost. Sus butos es de azer un diksyonaryo de Holokost. Este byervo puede ser un sentimyento u un byervo ke mos vino al tino en el momento mizmo.
A parte de esto; estos mansevos muy presyozos organizaron una semana de filmos de Holokost entre el 15ᆩ nisan en el nombre de “ KARA KARE” ke kijo dizir: un kare eskuro, ariskuro i preto, por akodrarmos de la desgrasya de akeyos diyas.
Estos filmos djugaron en un sentro i aya izyeron un dekor maraviyozo; kon los briles espinozos (Dikenli teller) en los tavanes, ke estavan emosyonando a todo modo de djente ke partisiparon.
A parte; todas las letras del alfabe de A fina Z; en kolor preta empyes a la entrada; i todos estavan apegando los byervos ke eskrivyeron enriva la letra korespondente.
Puediyaj ver; el revolto, los rekuerdos, los byervos chapteando al ojo de las personas; puediyamos meldar el aborresimyento, la tristeza, i munchos sentimyentos diferentes en las karas de las personas.
El buto de los mansevos era de ekspozar todos los byervos del Holokost en este dekor.
Ma malorosamente; muestro puevlo es insensivle en este sujeto. Yo penso ke; de estos 3000 abonados; deviya de aver a lo menos 2000 byervos ekspozados.
Ma; aviya puedeser el dyez por syen.
Esto es no dar emportansa, al esforso de los ke aparejaron kon muncha ardor; esta ekspozisyon; tomar a livyano muestra egzistensya, i no pensar al 1.5 de kriyaturas i en total a los 6 milyones de personas ke se muryeron.
Yo esperava un poko mas de solidaridad por motivar a los ke dyeron tanto tyempo moral i materyal por preparar esta ovra konstruktiva. “Felisitasyones el grupo de mansevos i mansevas, ke lavoraron de alma i de korason”; i de mijor a mijor para kada anyo...
Antes dos semanas se komemoro el Holokost “Yom a Shoa” en la sinagoga Ashkenaz; kon el Grande Rabino de muestra komunitad, el presidente de muestra komunitad, el Konsul de İsrael i todos los delegados, los rabinos, hazanes, i myembros de la komunitad.
Ma malorosamente se estava vyendo ke aviya poka djente. La partisipasyon deve de ser mas muncho kada anyo.
Mozotros devemos de apatronarmos de estas okazyones; devemos de akodrarmos i devemos de transferar todo lo ke mos ambezimos en este sujeto a los mansevos, i a todos mozotros.
Todos devemos de ser yenos de kerensya; devemos de ser egzempyo, de propajar muestra luz a todo el mundo.
