Klara PERAHYAEl kolokyo nombrado “La Jornadas de la Kultura Sefardi” ke tuvo lugar del 29 la manyana asta el 30 Avril medyo dia, en el Instituto Cervantes de Estambul, fue una reunyon kosmopolita, kompuesta de partisipantes de diferente lugares del mundo, de la Peninsula Iberika byen entendido komo de Israel, lngletyerra, Turkia i Almanya.
Coya DELEVİ
Asigun mis observasyones del derredor, lo ke vo sintyendo de uno i de otro, no esto pudyendo impedir de preguntarme: deke mos izimos eskasos de palavras dulses, de byervos de enkorajamyento? Porke estamos mas prontos a kritikar (por lo mas en sensyo negativo) al lugar de alavar i felisitar? Es ke mos olvidimos de gustarmos de la reushita, de la felisidad de otros? I, ansi un monton de preguntas...
Keridos amigos, puede ser es primera vez desde ke ampesi a eskrivir, ke ekspozo una semeja de pesimismo. Portanto los ke me konosen ya saven muy byen ke so kaji un simbolo de optimismo. Bueno, deke ampesi kon estas kestyones al lugar de eskrivir un ermozo artikolo de Primavera? La verdad ke no se...D’akordo!..sera en un momento de ataganto...Ma, en todo kavzo no aze danyo de vez en kuando de pozarmos estas preguntas i de responder frankamente i sinseramente...
Estamos bivyendo la Primavera, i komo syempre ay una egzaltasyon. Ma koza kuryoza, no al mizmo nivel de kada anyo. Una amiga me estava dizyendo: “En Avril ke deve ser mez de luvyas, kada demanyana ke esta amanesyendo un diya klaro, no me esto pudyendo alegrar. No esto pensando al plazer de pasear. Mas muncho esto reselando los diyas futuros ke puedemos tener estrechura de agua...”
Komo lo estash vyendo keridos lektores, al pareser el pesimismo es kontajyozo!!... Ay de rogar ke asta el diya ke se va publikar este teksto, vamos a tener diyas luvyozos...Oganyo no tuvimos un invyerno verdadero. La sezon ke los arvoles deviyan ser emblankesidos, ya es verdad ke los ramos se vistyeron sus “parür” blanka!..Solamente kon una chika (o grande!!) diferensya..No la inyeve, ma fue las flores blankas de arvoles frutyeros ke se adelantaron!..
Sin egzajerar puedo afirmar ke bivimos una Primavera “permanente,”ke en una mezura mos arrevato la sorpreza de la mueva sezon. Ke ermozo lo aviya eskrito en mi artikolo del Mayo 2005:”En estos diyas una demanyana mos espertimos kon un timido rayo de sol, primer ke reusho a pasar a traves los pancdjures...Mos alevantimos kon el dezeo de avrir la ventana i respirar...El aver mos paresyo mas livyano, el sol mas klaro, mas kayente..Los arvoles desmudos asta antes unos kuantos diyas, se vistyeron de una kolor vedre komo si un mirakolo se realizo entervalo de una noche...”
Esto era el renovelamyento de la natura, la Primavera, despues de los diyas eskuros i yelados del invyerno... Oganyo vimos otruna vez el “festival” de las tulipas, de kolor i kolores...Deshando por un lado las kondisyones atmosferikas, Avril fue mez de selebrasyones i evenimyentos. La fyesta de Pesah, despues las komemorasyones de la “Shoa,” del “Getto de Varsovia,” el “Yom Azikaron”i enfin el “Yom Aatsmaut” koensidando en el 23 Avril, kon la fyesta de “Soverenedad”(Ulusal Egemenlik ve Çocuk Bayramı”...
Entre el 27ᆲ Avril, Estambol fue el sentro de aktividades enteresantes, kon la organizasyon de los “Diyas de Kultura Sefaradi.” El 27, noche de Shabbat, estuvimos envitados a partisipar a la sena de “byenvenida” (hoş geldin yemeği).Fue un grande plazer de konoser de serka tantos nombres famozos. La nochada paso en una atmosfera de kordialidad. Tuve una kayente konversasyon kon Flory Jagoda “La Kerida Nona” komo la nombramos. Todas las dos tenemos en muestras raizes (köken) ansestros “Altaras.”Antes de partir, mos travimos foto. Entre los envitados ke vinyeron de diversos paises, enkontri syertos ke ya tuve okazyon de konoser mas antes. 28 la noche asistimos al konserto de inogurasyon, en el Kampus de la Universidad Bilgi, ande Flory fue la “estreya” de la nochada. Los 2 diyas sigientes tuvimos konferensyas sovre la “Kultura Sefaradi,” en el Instituto Cervantes.
Por razon de lugar i tyempo limitado, es difisil de entrar en detalyos. Me kontenti de dar un kurto “kuento-rendido”. Por siguro vamos eskrivir en ancho seya en Ladino, seya en Turko en los diyas ke vyenen.
