Este dia es une selebrasyon i en mizmo tyempo una reminisensya..I no es solo los ijos ke se rememoran el tyempo pasado, ma las madres tambyen ke munchas vezes azen un djenero de introspeksyon.
Un vyejo reselo se desperta en kada una de entre eyas , un dubyo, una kestyon:
Eske pude dar a mis ijos todo lo ke kalia darles? Eske supe entenderlos i no solo amarlos?
Eske syempre parveni a respektar sus individualidad sin mirar de proyektar en eyos la mia propya? transmeterles mis valores en tomando tambyen en konsiderasyon las suyas? akseptar sus aspirasyones i no impozarles las mias?
Eske los deshi libres kuando se tratava de eskojer tal o tal kamino i ansi permeterles de azer sus propya eksperyensa ? Es ke ( afin de darles konsensya de sus responsabilidad) acheti de desharlos reelmente solos en la realizasyon de sus proyektos, malgrado mi espanto de verlos azer un yero?
Es ke les ambezi la alegria de dar mas grande ke de tomar i de amar mizmo sin grande esperansa de retorno?
Eske les dishe de ser striktos enverso eyos mizmos, i induljentes enverso los otros?
Eske supe ser absolutamente imparsyal kuando tenian litijyos kon un kualkyer amigo i en syertos kavzos dizirles frankamente ke no tenian razon, al risko de pedrer por un syerto tyempo sus kerensya?.
Eske les ekspliki ke no kale syempre eskojer la fasilidad ma akseptar (kuando es nesesaryo) las difikultades... ke azer un yerro no es una koza irremediavle a kondisyon de rekonoserlo i kerer reparar, lo ke realsa la persona i nunka la arrebasha
Enfin, eske les ensenyi a mirar mas aya ke sus propyas persepsyones, a no kedar enserrados en sus solas ideas i a oyir lo ke dizen los otros, sin por esto renunsyar a sus konviksyones tanto ke las syenten djustas.
Eske los engrandesi en syempre tenyendo el kudyo de repetarles ke kale saver ganar kon modestia i pedrer kon dinyita , ke ninguno tyene el derecho de reduzir el otro a sus solas kreensas, ni konsiderarlo komo un adversaryo ma komo una simple persona rika de su eksperyensa individual.
I por kloturar, eske les ambezi a ser “eyos mizmos” en toda simplisidad, sin nunka kayarsen delantre una injustisya ni kedar indiferentes delantre la sufriensa de ken ke sea.
