Klara PERAHYAAlhad pasado el 13 del mez de Mayo fue el dia de las madres . Kuala ke sea la opinyon septika de los pesimistos, este dia es la okazyon de ekspresar un poko de gratitud enverso la ke no solo mos dyo la vida i mos engrandesyo, ma ke syempre (biva komo muerta) sentimos a muestro lado en los momentos de difikultad ...
Coya DELEVİ
Oy esto en unos de los ralos momentos ande no topo komo ampesar a eskrivir. Tenemos delantre de mozotros la ermoza fyesta de “Shavuot”. Ma, ya eskrivi en la oja “Kavram” la semana pasada. Ya es verdad ke trati mas muncho de las Madres Djudias, i de syertos rekuerdos miyos sovre “Shavuot”, lo ke me emosyono bastante.
En pasadas el Sr. Edmond Cohen de Paris, mando a la redaksyon de “El Amaneser” un mesaje bastante instruktivo. Muestra kerida Güler Orgun, komo syempre tuvo la amabilidad de mandarmelo porke aviya unos dos pasajes konsernando mi artikolo de Avril, sovre “El Solevantamyento del Ghetto de Varsovia.” Aki tekstualmente los byervos del Sr. Cohen:
”...La Sra. Delevi al kavo de su artikolo avla de una rezistensya de 28 diyas. Es vedra ke el solevantamyento empeso el 19 Avril 1943 ,i ke el 16 de Mayo el Jeneral Stroop eskrivyo en su raporto-..180 djudios fueron eksterminados-...”
El Sr. Cohen kijo apuntar ke los kombates no eskaparon en 28 diyas komo lo eskrivi yo. No se si el va meldar etas linyas. En todo kavzo aki esto sintyendo el menester de aklarar un punto. İ yo se ke los kombates kontinuaron muncho mas, kaji un anyo, porke meldi un monton sovre el sujeto. En mi artikolo yo avli solo del kombate del “bunker de Mila 18” ande muryo Mordehay Anielevitch, i sus amigos djustamente el entervalo de 19 Avrilᆤ Mayo.
De otra parte kero ekspresar ke yo personalmente, esto avyerta a todo modo de kritika i koreksyon. Esto es una manera de ambezarmos mas, i tambyen una preva de konstatar ke muestros artikolos se estan meldando. Tuvo entervalo mi ijo la okazyon de korresponder personalmente kon el Sr. Cohen sovre su emisyon en la radio Parizyana. En su repuesta “imedyata” entre otras el ekspreso tambyen ke melda kon entereso mis eskritas, lo ke me izo grande plazer...
Oy, al pareser es el diya de las koreksyones!..En mi artikolo sovre mis enkontros kon Flory Jagoda, ize un yerro. Mi ijo Metin, en la mezura ke le permete sus okupasyones, se enkarga kon plazer, syertas misyones en BARIN YURT. Da su korason, i su amistad, i una partida de su tyempo a los pensyonaryos. En este kuadro, antes un syerto tyempo, demando a Flory si era posivle de mandar para Barınyurt, su D.V.D. Antes 2Dž semanas, ambezando ke Flory iva venir a Estambol, renovelo su rekuesta. Dunke el D.V.D ke Flory dyo a mi ijo, no era en realidad para Metin, ma, solamente i unikamente para los pensyonaryos de BARIN YURT. Esto lo supe despues. Demando eskuzas, espesyalmente de mi ijo, ke fue tan embarasado por mi yerro. Espero ke la Kerida Flory va tener la oportunidad de meldar estas linyas, lo ke esto reelmente suetando.
