Ambisyon

Coya DELEVİ

“Las personas tyenen grandes pretensyones, ma chikos preyektos”Esto fue una refleksyon anonima. La ambisyon, es una kualidad o una falta? Asigun mi, es una kualidad, ke puede devenir falta, si es egzajerada. Muncha djente pensan ke kale ser ambisyozo, para reushir en la vida. Es un punto de vista, bastante djusto. Bueno, una persona sin ambisyon, no puede reushir?, o es kondenada a no lograr?…
A la baza de kada echo o lavoro, ay syempre una ambisyon, ke se puede eksplikar kon el dezeo de reushir. Esto es verdad, i, este sentimyento es la razon de ampesar. Lo puedemos, mizmo nombrar “esperansa.” No se mas ke nombre se puede dar a la fuersa ke pushe el ombre, i ke tyene diversos aspektos i formas.
Ay personas ke dezean la reushita por orgolyo o por el amor del arte, de la sensya ets…Otros, por ganar moneda, onores, titolos o para entrar en ojos de una persona…En vezes, se tyene ambisyon, “al kuento” de otra persona. Es el kavzo de los djenitores ke son ambisyozos por sus kriaturas, i luchan para azerlos reushir. Ma, en este egzempyo, yo penso, ke es i por kontentar sus propya ambisyon, i tomar, komo dezir?, la vengansa de una koza, ke eyos, no parvinyeron a reushir! En la vida s’enkontra  muncho, talos egzempyos. Ma, ay probabilidad, ke estos ijos keden de avansar si, par azardo, los paryentes no les pueden entonses ayudar.
Es una fuerte ambisyon obstakolo a la felisidad?. Penso, en syertos kavzos, ke es. En kualkyera profesyon, es bueno i menesterozo de ser ambisyozo, lavorar, perfeksyonarse i adelantar. Ma, deve aver i un limito. Kale ser razonavle, i no dezear lo imposivle. Porke, si no lo alkansas, puedes ser muy malorozo. Mezmo, si la persona arrivo a la sima, i, por modo de esto sakrifiko, o, diremos, neglijo su famiya, sus amigos, su repozo i todas las alegriyas de la vida, entyende muy tadre, ke se yerro. Los regretos, en vezes, pueden mizmo entosegar una briyante reushita…
No son palavras literaryas, ma, syertas realidades de la vida. Reushita, no es syempre sinonimo de felisidad. Munchas vezes es la kontra. La semplichita, trankilidad pueden ser una manera de verdadera felisidad, tambyen. A kada uno su opinyon…İ aki, una dicha de David De Brueys: ”L’ambisyon en orientando muestros ojos verso el avenir, mos detyene de gozar del prezente.” En realidad, djente sin grande ambisyon, tyenen shans de ser orozos, porke son kontentes de sus suerte, mizmo si no es muy briyante. Por siguro, esta sezudeza, no la tenemos todos!…O, puede ser ke yo me esto yerrando.
Para reushir, puede la shans, remplasar la ambisyon? En el empesijo, si. Por egzempyo, en el domeno de muzika, ay muy ermozas bozes, ke ganan konkorsos, i mizmo aferran la shans de azer kontratos, angajamyentos. Ma, si no tyenen ambisyon, i un karakter fuerte, nunka pueden azer una karyera profesyonal. Aki se puede dezir ke la ambisyon es un estimulante, ke ayuda el ke kere ganar una reushita turavle.Una ambisyon egzajerada puede tambyen kavzar mankansa de onestedad. Para arrivar, a todo presyo, uno puede dezear eliminar todo modo de obstakolo, delantre de su reushita. Kalomnias, i kaminos malonestos, a la fin, le aze mas muncho danyo a si mizmo…
El ambisyozo deve kontar solamente sovre su lavoro i su valor, achetar la rivalidad onesta, en todo punto de vista. No kero emplear byervos grandes, ma, ya savemos todos ke una ambisyon syega, puede yevar fin al krimen. Esto s’enkontra en la Historia. Naturalmente, son kavzos eksepsyonales.
Orozamente, todos los ambisyozos, no son ansi. Yo penso ke una ambisyon razonavle, es komo un “dopping” en la vida. İ, por final, una refleksyon anonima, un buen mesaje:”Kuando te keshas de la vida, es kaji syempre porke le demandates l’imposivle...”
                                                                                         

ESPERANSAS I REGRETOS
 
Syempre, tuve esta kreensa,
Ke nase kada persona,
Kon una syerta vokasyon,
I, en vezes, alguna misyon…
Ken doktor, ken arkitekto,
Ken es artisto, ken avokato. 
Kada uno, siguro ampesa,
Kon muy muncha esperansa,
Kon ambisyon, kon proyektos,
Ay, reushita, i vezes, regretos…