Mümkündür Mucizeler" / La realizasyon de una promesa

Klara PERAHYA

Debasho la  pluma yena de kolor i de vivasidad  de Rita Ender i Batya Kebudi, Rafael Torel mos konta su vida
“Mümkündür Mucizeler“ es la saga de uno de los mas prestijyozos ombres de muestra komunidad, la istorya de una ermoza asensyon a partir de una situasyon ekonomika muy flaka, i sovre todo de la realizasyon de una promesa echa en su manseves, una tadre, en pasando kon vapor delantre el Hospital “Laura  Kadoorie” de Balat.
 Anyos difisiles de lavoro duro, de lucha kontra las rivalidades, kontra el selo i munchas vezes la perfidia de su entorno, ma tambyen anyos luminozos de esforsos, de esperansa i de amor.
A la sigida de una introduksyon yena de subtiles analizes i  profundas refleksyones, Rita Ender i Batya Kebudi redaktaron (en un estilo muy fidel a lo ke oyeron) las largas konversasyones ke eyas tuvyeron kon Rafael Torel, lo ke mos da una idea de la simplisidad i  sovre todo del umanizmo de esta persona eksepsyonal ke es el narator.
Para el, la vida fue un kontinual esforso de adelantamyento , i es grasyas a esta kontinuidad  sin interrupsyon, malgrado las difikultades ke el enkontro sovre su kamino, ke Rafael Torel pudo ayegar a su eskopo.
En el, parese aver una meskla inekstrikavle “de refleksyon i de aksyon”,“de imajinasyon i de observasyon”, “de fidelidad al pasado i de menester imperyozo de avansar”, una konfiansa en si mizmo ke nunka trespaso las limites del realizmo
A mi pareser, Rafael Torel fue i es ainda oy, un grande vizyonaryo ke tuvo syempre la obstinasyon de meter a egzekusyon su proyekto, sin nunka  akseptar de renunsyar....
Su chikes fue muy difisil. Guerfano de padre a la edad de sinko anyos, el fue engrandesido por una madre yena de kerensya ma de kondisyon ekonomika muy modesta . Las desgrasyas se sigyeron las unas a las otras kon persistensya i krueldad. “Sinko mezes despues la muerte del padre, traisyon de la parte de los kolavoradores del difunto”, mas tadre “İnsendyo ke englutyo una vyeja  kaza de tavla ke les apartenia” , “ineksperyensa de la bivda” etc..etc....   
Ainda eskolaryo, kuando en enverano sus amigos entravan en la mar i korrian en los kampos , el profitava de los dos o tres mezes de vakansas para lavorar i  ganar un poko de paras.
İ mas tadre , kuando syertos mansevikos de su edad empesaron a ir  a la universidad, Rafael Torel fue ovligado de echarse a la vida de echo  sin pueder mizmo terminar enteramente sus estudyos .
Su primer importante empyego fue en la Firma Gislaved. Es aya ke empeso reelmente su verdadera formasyon . Pushado por su  ambisyon  de kerer  romper el sirkulo visyozo ande se topava enserrado, el lavoro de una manera desfrenada , de la madrugada asta medya noche .
El pasava largas oras en los atelyes, bushkando a entender el sekreto de fabrikasyon de los artikolos ke la firma produzia, demandando, peskuzando, el esprito syempre espyerto, apartando kon muncha perspikasidad la parte de  falsedad de syertas repuestas.
La firma Gislaved era situada  en el “Haliç”  i  demanyana i tadre, el pasava  kon vapor delantre el Hospital  Laura Kadoorie de Balat ke akudia  i melezinava poveretos en el apreto.  Es aya ke Rafael Torel  en su korason, prometyo al Dyo de azer de mezmo, a la mezura de su poder.
El mantuvo su palavra. Aktualmente, su filantropia no se limita solo a azer immensas donasyones materyales. Ay tambyen  en el la voluntad de pushar otros byenazedores a kumplir ovras karitativas, lo ke es muy muy importante.   
Una palavra pronunsyada por el mizmo, revyene kontinualmente en el teksto del livro: “shans”, a la kuala el atribue una grande parte de su reushita .
No se, asta ke grado esto es djusto. Por seguro uvo en su vida sirkunstansyas  favoravles, propisyas a muevas realizasyones, ma kreo ke no es el faktor determinante de su reushita .Desde su prima manseves, ya avia en el , al estado potensyal,  todos los elementos menesterozos a un semejante adelantamyento: “su ardor infatigavle de salir del estado de prekaridad ande se topava”, “su  kudyo  por todo lo ke konsernava su lavoro”, “su interes por  lo ke se  elaborava en su entorno”etc...etc...
Si, komo lo dishe al empesijo de esta eskrita, “Mümkündür mucizeler” es la saga de un ombre eksepsyonal. I tambyen (grasyas a la subtilita de Rita Ender i Batya Kebudi) este livro es una pajina de istorya ke mos da una idea de lo ke era la vida de muestra komunidad  al  prinsipyo del venten siglo, de los problemas a los kualos eya era konfrontada, de su manera de pensar, de sus prejuisyos i en mizmo tyempo del ermozo esprito de solidaridad ke se manifestava en los momentos los mas eskuros...