Mois GABAYHikâyem, 4 sene evvel Taksim`de arkadaşımla, The Marmara Oteli`ne bir iş için uğramamızla başladı. O günü, bugün gibi hatırlıyorum. Otelde, belki de hayatımı değiştiren bir 15 dakika yaşadım. Dostluk`un Kula Tiyatrosu aracılığıyla tanıdığım Yako Igual ile karşılaşmam her şeyi değiştirdi.
Coya DELEVİ
Kuando va aserkandose el mez de Junio, la persona ampesa a guluzunarse (hevelenme) i azer suenyos da vakansa. Poko a poko estos suenyos se transforman en planos i programes. Espesyalmente los ke lavoran en institusyones, fiksan sus datas de konje, i se arranjan para informar la direksyon. Aparejos, empleos de vestimyentas muevas, azer un poko de dieta, en previzyon del “bikini”!!ets..İ buenas vakansas!...
Esto todo es para los ke tyenen la shans, i todo modo de posivilidad komo tyempo, salud, moneda i otras kozas ke no me esto akodrando en este punto. En kurto, dingun impedimyento...Partyendo de esta konstatasyon (saptama) se izo una enkuesta el anyo pasado, a la fin del otonyo. Partisiparon komo 17.000 personas. El rezultado me entereso, aun ke aviya un monton de shifros. No kero kansar el lektor kon los detalyos. Transferar aki estos todos shifros va solamente apezgar mi teksto i enfasyar el meldador.
En la enkuesta ke deve servir tambyen de estatistika, uvo dos preguntas esensyalas:
1)- Si tenesh la uzansa de salir en vakansas, ke mez preferash?
2)- Si no salitesh en konje, o no izitesh vakansas, aklarad porke razones?
Bueno, 40 % de los partisipantes respondyeron ke uzan azer vakansas, lo ke izyeron tambyen i el anyo pasado. La mayoriya disheron preferar el mez de Agosto, la sigunda preferensya fue Julio, i enfin el resto disho Junio.
Keridos lektores komo se esta vyendo del porsentaje 60 %, los ke no se fueron o no tuvyeron la posivilidad de salir en vakansas, formaron una mayoriya absoluta. Los ke respondyeron “No me pude ir a dingun lugar, no ize vakansas,” depasaron de leshos los ke se fueron. Kere dezir, mas de la mitad de los partisipantes a la enkuesta...İ por diversas razones. Kulas son estas razones? Las va enumerar de sira, ampesando del maksimum:
1)- Kaji la mitad de los 60 % dyeron la mizma repuesta: imposivilidad materyal. Sus budjeto no les permete de pagarsen un konje largo kon, o sin la famiya. Lo ke pueden es un paseo, un piknik o un kafe en en el bodre de mar, i tornar a kaza.
2)- Un grande grupo respondyo, syendo sus primer anyo en el empyego, no tuvyeron dingun derecho de konje...Enteresante!...
3)- La mas kuryoza repuesta ( a mi ideya) fue la de los partisipantes tenyendo al pareser! todas las posivilidades. Patrones de echo, dingun problema materyal. Eyos disheron:”Deshad ir en vakansas, no tengo tyempo ni - de arraskarme la kavesa!- ( esta es una dicha Turka, mozos dizimos otra koza!!) Keridos amigos, si demandash mi idea, yo digo ke estos sinyores son mal organizados.
Naturalmente ke munchos no se pueden ir a pasear por diversos impedimyentos ke salen la ora d’alkavo. Ay razones komo: paryentes dezrepozados, nikochiris, ay kestyones de famiya i un monton de razonez diferentes...Yo penso ke esta no es una enkuesta ke puede permeter de jeneralizar sovre la totalidad del puevlo. Ma, aun kon todo, una partisipasyon de serka 20.000 abitantes ya da chikos indisyos.
Espero ke no vos enfasyi kon mi estatistika. A mi lo ke me kedo es de suetar ke seyash entre los 40 % de esta enkuesta. Seya Junio, seya Julio o Agosto, no importa. De vez en kuando es bueno para la salud de trokar techo i aver...Enveranada alegre para todos...
