Kualo es la muerte? Kestyon ke mos obseda, kestyon sin repuesta o, puede ser, a la kuala kada uno responde de una manera diferente.
Para los unos: Un akavamyento absoluto, la disparisyon por syempre en el grande nada. Para otros: por seguro syempre una fatalidad ineluktavle, ma tambyen la posivilidad de una prezensya ulteryor en la memorya de los keridos i sovre todo en una aksyon ke perpetuara el "ser" del ke no bive mas.
I es esto ke Perla i Daryo Erbeş kijeron kumplir por sus ijo İzi Erbeş trajikamente arrankado a la vida por un terrivle aksidente de otomobil...un kontakto entre el difunto i el mundo.
Ay de esto 10 anyos, despues el anunsyo de la terrivle trajedia echo a la madre i al padre, despues el periodo de dolor loka ande todo paresia pedrer su senso, despues el reflekso inevitavle de revolta, despues las lagrimas, eyos eskojeron de responder a la muerte por la vida.
Esto por seguro no izo despareser sus dolor , kompanyera fidel sin facha ni sombultura de los ke pyedren por syempre un kerido irremplasavle, ma a la sufriensa se adjunto un sentimyento de serenidad , la konsensya djustamente de arrankar del “nada absoluto” el ke no es mas fizikamente en este mundo.
Dar sin nada asperar, komo un menester irrezistivle de transmeter ...dar a otros un poko de sus propyo tyempo, de sus esforsos, de sus egzistensya, al nombre de sus ijo, para ke El Sea ainda.
En desparte de numerozos otros aktos filantropikos, kada anyo, Perla i Daryo Erbeş realizan a la memorya de İzi, kon la kontribusyon del korpus ensenyante i dirijente del UÖMO (Ulus Özel Musevi Okulu ) un konkorso literaryo i artistiko al kual partisipan numerozos estudyantes .
A la okazyon del dyezen aniversaryo del dolorozo evenemento, eyos publikaron los rezultados de estas kompetisyones desde el anyo 1996- 1997 asta 2005- 2006, tekstos i desenes indo de las klasas del ensenyamyento primaryo asta las del liseo . ...
Un konkorso no es un simple egzamen ... en el ay una fuersa inkreivle de emulasyon. El es una konkorensya pozitiva ke pusha kada partisipante a dar lo mijor de si mizmo i a ir asta la ekstrema limite de su kapasidad.
Munchos talentos seran ansi revelados, munchas aspirasyones realizadas.
Al verso del livro, estas tan ermozas palavras:
Izi gitti !
Izi kaldı...
Es grande la fuersa del amor i komo lo eskrivyo Tülay Gürler:
Sevgi olmasa; deniz,mavisiz
Sevgi olmasa, yağmur,susuz
Sevgi olmasa; ağaç dalsız...
Sevgi olmasa; insan,dilsiz ...
