Sien Anyos de Bet Israel de Izmir

El pensar en Bet Israel me inche de nostaljia, kon memorias ermozas i emosyonantes.  Mozotros moravamos serka de la kehila; todos los ombres de la famiya entera (gran papa, tios, suvrinos, chikos i grandes) ivan ayi, i despues de la tefila de Shabat  veniyan ande mozotros a dezayunar kon las famozas roskas i boyos de mi mama (ke eran los mijor ke podian egzistir), guevos haminados, fritadas, i mas.  Del balkoniko de muestra kaza en 287 Mithat Pasa Caddesi (antes de 1950 era Inonu Caddesi) siempre yo mirava los ke pasavan indosen a la keila o saliendo, i le dava haber a mi mama kuando los ombres ya estavan saliendo de la tefilla, para ke este pronta la meza.
 Tanbien era plazer mio mirar de este balkoniko en dias de bodas (kuaje todas en alhad) a los ke pasavan, todos bien vistidos, sovre todo  las mujeres kon sus fostanes o tayyores (tailleurs) i chapeyos shikes (chiques) de la kava moda, i las ijikas kon los fyongos grandes en la kavesa, i fostantes de tafta kon volanes anchos abasho. I despues pasava el taksi kon la novya alyentro, i algunas vezes las kriaturas de la mahalle korriamos para ver la novya  salir del taksi i entrar a la keila kon su famiya i los chikos "mosyos i madmuazeles d'onor". (Avia tanbien "mosyos i madmuazeles de resepsion", mas grandes, ke amostravan el lugar de asentar a la djente ke viniyan, ma estos ya estavan alyentro de antes de la ora de la boda.)  En los anyos de 1950 avia de tres a sinko bodas en el mezmo dia, s'eskapava la una, salian la djente, i se empesava la otra.  Ma muncha djente kedavan para las siguientes bodas -  ke es, entravan demuevo, despues de salir a felisitar al novyo i la novya en el salon de la entrada, ande estan las lajas de mermer kon los nombres de los donadores engravadas en letras ebreas doradas.  Siguro munchas vezes mozotros estavamos entre los envitados, porke los kazamientos eran de muestra famiya, de vizinos, o de amigos.  Puedo dizir ke en dingun lugar del mundo no ay el hen  i la grasia i las tradisiones ermozas de las bodas de Bet Israel, ke kaje no aven trokado asta el dia de oy. (Siguro agora mas no esta  la violonista Madam Amat i su grupo de tanyedores, ke de la azara de mujeres tanyiyan la marsh de boda kuando entrava la novya i otros pedasos klasikos a la salidura, i entre medyas tambien kuando la seremonia dava espasio para los "monsierus i madmoiselles de reception" ke den las bonbonieras a kada uno i uno en asistensia. I no mos podemos olvidar del Garson Rifat, ke este en ganeden, ke kaje toda su vida dirijo las envitasiones de la kezada i la kumida despues de las bodas.)
Komo  miles de otras personas, i yo me kazi en Bet Israel.  Ma kreygo ke mi kazamiento ayi es uniko en un aspekto.  Yo estava estudiando en los Estados Unidos (en Lindenwood College, St. Charles, Missouri) kuando enkontri al mansevo (Amerikano de famiya Ashkenazi orijinarios de Rusia) ke iva ser mi marido.  Ma yo avia vinido kon mi "bagaj" de Izmir.  Todas las bodas ke yo tenia asistido en mi vida entera eran en Bet Israel.  La verdad es ke asta ke vine a la Amerika yo no tenia metido pye alyentro de otra kehila.  (Lo ke pensi de los templos ortodoksos, konservativos, i reformistas ke vide aki es otra estorya.)  I no me podia imajinar kazarme en otro lugar aparte de en Bet Israel.  I esta fue mi kondision: akseptava kazarme kon el, solo si el venia a Izmir a kazarmos en la keila de mi famiya, djuntos kon mi famiya, en Bet Israel.  I kreygo ke asta dia de oy no uvo otra boda kon un Amerikano ke vino solo para kazarse ayi kon una Izmirliya, i no kedo a bivir en Turkia. (Mozotros mos fuimos a bivir en Rotterdam, Hollanda.) I si ay i si no ay otro ke izo lo mizmo, esto amostra la amistad i nostaljia ke siento yo por Bet Israel, i toda la djente asosiada kon eya de los anyos pasados.  Ke biva syenes de anyos mas, i ke munchos otros bivan dias de alegria adientro de eya.